Kawno lagé nou on 15 novanm

Kawno ki lésé on 15 novanm

tout pèp Gwadloup adan on penn

Lèlandèmen a on 15 novanm 1998, tout pèp Gwadloup té ka apwann mò a on gwan tanbouyé a péyi-la, misyé Moléon Jernidier toutmoun té ka kriyé Kawno. Misyé Kawno té sòti jou-lasa adan on léwòz ki té ni labitid fèt aka man Soso Jabren Bémaho. I té ka fè istòp anbò a chimen-la an plen lannuit-la é sé kon sa on loto bay on tap.

Kawno jwé èvè on pakèt gwoup an péyi-la é sé adan yonn i kréyé èvè dòt tanbouyé on ritm yo kriyé sobo*.

Kawno té menm jénérasyon ki Vélo. Kawno é Vélo té ni on èstil ki ta-yo. Vélo té ka maké tanbou a-y doubout é i té ka mété délè pyé a-y asi tanbou-la lè'y té ka maké. Kawno li kant-ay té ka maké tanbou a-y kouché èvè on ja dèyè-y.

* Mi on son sobo onlo moun a tanbou konnèt Kawno té jwé adan on fèstival Lapwent an 1991 :

Pa obliyé Maksimilyen, pa obliyé

Pa obliyé Maksimilyen, pa obliyé

Pa obliyé Maksimilyen, pa obliyé

Panga ou obliyé pwomès-la ou té fè mwen la