Ka yo vlé ojis?

RSTA é RSA, sé dé biten diféran!

Ka yo vlé ojis an ti-péyi-lasa? Ba travay valè oben ankò mèt lasistana douvan? Davwa jounal "Fwansmanti" ka mété adan tit a-y moun dwèt chwazi antrè RSTA é RSA. RSTA (Revenu Supplémentaire Temporaire d'Activité an fwansé) sé on lajan ka vin anplis anlè pèy a travay a-w alò kè RSA (Revenu de Solidarité Active) kay ranplasé RMI-la ; kivédi RSA sé on alokasyon. RSTA é RSA sé dé biten diféran. Moun ki dwèt touché RSA sé moun ka gannyé 1,4 "smic" mwens prim é akséswa. Mé konm léta kolonyal fwansé sé on léta bandi, i mété prim é akséswa adan-y ; kifè onlo gwadloupéyen pé ké touché RSTA. Alò yo ké oblijé rantré adan lasistana davwa yo ké mandé touché RSA-la. Nou sav sé lèMEDEF ki dèyè tou sé biten-lasa padavwa i pa signé akò Bino-la èvè entèsendikal-la an 2009. Sé mésyé vlé pa péyé fòs a travay a gwadloupéyen, yo vlé mété gwadloupéyen adan lasistana!