-
Sé bwabwa annou-la enmé koupyé-la toubòlman!
On bann bwabwa ki enmé koupyé a mèt a-yo!
Mèt a kaz-la Sarkozy di sé bwabwa annou-la, zafè a adaptasyon a zòt-la, arété sa! Wouvwè kopi a-zòt! Lè sé bwabwa-la sòti adan kaz a mèt a-yo, ka yo di? E ben yo di yo kontan! Wè,wè,wè! Sarkozy té pé menm jiré manman-zòt, zò té'é di zò kontan osi! Plis ki janmen zò ka démontré pèp Gwadloup zò sé bon bwabwa menm! Sa pa posib! Mèt a-zòt ka ba zòt koupyé é zò ka vin niché pyé a-y!
Mèt a-zòt ba zòt twa lanné pou zò paré on pwojé ba Lagwadloup. Ès zò ké fè-y? Padavwa sèl biten ka entérésé zòt sé gadé plas a-zòt. Zò poko paré-y pas zò ka chonjé alè élèksyon pou konséyé jénéral. Alò a pa on bann bwabwa nou tini an péyi-la? E pli mové-la sé vwè gwadloupéyen ka fouté é woufouté sé moun-lasa la!!! A pa Lagwadloup ki malad mé gwadloupéyen! Moun di fò yo konsyantizé pèp-lasa, é ben ké ni travay!
Sé enki Jalton ki pa rantré adan sé maji-lasa. I ti-bwen mwens bwabwa ki sé lézòt-la!
Tags : zot, bwabwa, met, koupye, lasa
-
Commentaires
An ja di'w li...sé moun-la ki vlé di gwadloupéyen ki ka bwè pawôl a misyé (pwésidan a konsey réjyonal) pli mové ki'y ankô.
Sé avan tou pa ignorans pas dapré mwen si sé moun-lasa té ka suiv réèlman sa ki ka pasé èvè misyé é tout bannélo'ay pèsonn pa té ké lévé misyé di gad jou pou té éli on moun pou woulé pou péyi-la
E nou patriyôt ka rèjwenn nou pou di kè sa ka pa entérésé ditou sé réaktyonè-la dè vwè nou ka pwodui padavwa sé adan kon ou di enpowtasyon-distribisyon ayo tini manman pwofitasyon-la...poukwa ou vlé yo chanjé fizi ayo dè zépôl ? alô kè sistèm kolonyal-la ka fè yo gannyé on pakèt sou....