Milyé, milyé moun manifèsté Barcelona pou lendépandans

a Katalòn.

Pannan nèg-la an Gwadloup vlé rété anba grenn a fwansé-la, pannan on dòt nèg vlé blan wouvin kolonizé péyi a-y Lèkamroun (blog a on ti-misyé yo ka kriyé Jean-Pierre Bekolo), an Katalòn, pèp-la ka anvizajé séryèzman trapé lendépandans a-y! Wi, dèmen dimanch, kay ni élèksyon antisipé a dépité a parlèman a réjyon otonòm a Katalòn an Èspagn. E la, nou ké vwè chif a moun ki vlé lendépandans a Katalòn. Jou 11 sèktanm pasé, milyé, milyé moun manifèsté Barcelona pou lendépandans a Katalòn. Ès nou ké vwè sa on jou Gwadloup? Yo fouté nèg-la tèlman adan lamandisité, adan lanonrèsponsabilité!

"Aaay Dominiiik!". Sé sa man Ophélia té ka chanté adan lélanné 80. On bèl omaj i té ka rann péyi a-y é i byen fèt fè-y padavwa péyi Domnik ka kontinyé fè chimen a-y. Chonjé jan gwadloupéyen té ka fè jé èvè moun Domnik pas yo té vin endépendan.

34 lanné apré, zò ni moun ka sòti an péyi Emira Arab Ini (zò li-y?) pou yo pwan...nasyonalité a péyi Domnik!!! Wi kanmarad, moun ka sòti an péyi a pétwòl, péyi rich kon Emira Arab Ini pou yo pwan nasyonalité a on piti péyi kon Domnik. Mé kon an toujou ka di-y, si ni piti péyi, pa tini ti-pèp!

Si moun ka sòti adan sé péyi-lasa pou yo pwan nasyonalité a péyi Domnik sé padavwa yo ké pé vwayajé adan on pakèt péyi san yo bizwen viza  kanmarad! E sé adan on péyi a nèg andidan Karayib-la yo vin chèché-y!

Alò gwadloupéyen pannan zò ka voyé labou anlè on péyi kon Ayiti kon zò té ka fè-y asi Domnik, toujou chonjé péyi pa ka toujou rété anba tè, yo ka toujou woupwan doubout a-yo! Gwadloupéyen, kontinyé rété anba grenn a fwansé, pannan sitan sé péyi-la owa an-nou la ka fè chimen a-yo!

Lè sé pou jwé lakoup di mond, fò'w mandé mèt-la lotorizasyon!

Lè sé pou lyanné èvè Domnik, fò'w mandé mèt-la lotorizasyon!

Lè sé pou achté pétwòl a Vénézwèla, fò'w mandé mèt-la lotorizasyon!

Ki moun é ki péyi an ka palé la?

Sa fèt! Kon an té ka di zòt adan dènyé biyé an-mwen, nasyon Gwadloup rantré adan òganizasyon a komité nasyonal olenpik a péyi Lamérik Santral é Karayib-la, yo ka kriyé CACSO. Tou sa fèt gras a pal a péyi Ayiti. Wi misyé Jean Baker, prézidan a komité nasyon olenpik Ayiti é vis-prézidan a CACSO, pòté mannèv pou fè Gwadloup é an menm balan-la Matnik rantré adan òganizasyon-lasa. E sé sa ki fèt apré akò a Komité Entènasyonal Olenpik (CIO).

Misyé Alain Sorèze prézidan a CROSGUA désidé sanblé onlo prézidan a lig é komité Gwadloup pou fè yo (sa ki poko fè-y) mété èspò a-yo adan fédérasyon panamérikenn. Pou lèmoman sé enki foutbòl-la, volébòl-la, taèkwondo-la, èskrim-la, bòks-la, bisiklèt-la, surf-la é gòlf-la ki ja afilyé adan konfédérasyon panamérikenn a-yo. Misyé Sorèze ka konté asi natasyon-la é atlétizm-la.

Tout sé èspò-lasa dwèt filé zouti a-yo, paré atlèt a-yo, pou yo pé rèprézanté nasyon Gwadloup kon i dwèt yé adan Jé Lamérik Santral é Karayib-la ki kay fèt an 2014 an vil Veracruz an péyi Mèksik.

CROSGUA alèkilé, ka pòté mannèv pou fè Gwadloup rantré osi adan komité nasyonal olenpik panamérikenn-la (PASO).

Komité nasyonal olenpik adan CACSO :

Awouba, Antig é Bawbouda, Bahamas, Bawbad,  Bèmid, Béliz, Zil Vyèj Anglé, Zil Kayiman, Kolonbi, Kòstarika, Kiba, Kiraso, Domnik, Sendomeng, Salvadò, Grènad, Gwadloup, Gwatémala, Giyàn, Ayiti, Ondiras, Zil Vyèj Mériken, Jamayik, Sentlisi, Mèksik, Matnik,  Nikaragwa, Panama, Pòtoriko, Senkis é Névis, Sirinam, Trinidad é Tobago, Senvensan é Grènadin, Vénézwèla.

Gwadloupéyen, zò pé méprizé ayisyen me fò zò konstaté si a pa té Ayiti, péyi an-nou pa té'é rantré fasil adan laliwondaj a-y ki sé Karayib-la. Mi prèv-la adan spò-la.

Gadé é kouté entèvyou a misyé Jean Baker ayisyen é vis-prézidan a CACSO pannan sanblé jénéral a òganizasyon-la an péyi Zil Kayiman an mwa òktòb ki pasé la.