Sylvain Fostin (Gwadloup)

115èm konbatan mondyal

a taèkwondo (-80 kilo).

Adan klasman bik entèwnèt a fédérasyon mondyal a taèkwondo ka sòti chak mwa, pou prèmyé fwa moun pé touvé non a on gwadloupéyen adan-y. Wi, adan katégori a mwen 80 kilo, Sylvain Fostin méyè konbatan a péyi Gwadloup é ki osi CTR a Lig Gwadloup a Taèkwondo, ka okipé 115ème plas-la asi plis ki 300 konbatan adan klasman mondyal-la. Toujou chonjé, sé rantré nou komansé rantré adan klasman mondyal-la padavwa Gwadloup afiliyé a fédérasyon mondyal-la dèpi lanné pasé. Pou lèmoman, Sylvain Fostin sé sèl konbatan gwadloupéyen ki adan klasman mondyal-la.

Dayè an bout a simenn pasé, té tini chanpyona Gwadloup kadé, jinyò é sényò an komin Tibou. On chanpyona ola yo kay pwan léméyè konbatan pou yo rantré adan ékip nasyonal Gwadloup. On ékip Gwadloup ki ké ay adan chanpyona di mond sényò an 2013 an péyi Mèksik é osi adan chanpyona di mond jinyò an 2014 an péyi Taywàn.

Joseph Séné an mitan a foto-la kay ni konm misyon,

woulévé foutbòl Gwadloup.

Yè dimanch, an vil Bémaho, Lig Foutbòl Gwadloup éli nouvo komité dirèktè a-y é osi nouvo prézidan a-y. San sirpriz, sé bwa dwa a ansyen prézidan-la misyé Guy Roch yo éli an tèt a lig-la. Non a-y Joseph Séné.

Misyon a-y sé ké woulévé ékip nasyonal Gwadloup é fè péyi an-nou rantré laFIFA.

Plis kamo asi foutbòl-la an réjyon an-nou, lyanné-zòt asi "Boul an Karayib-la" (http://caribbeanfoot.over-blog.com)

Ekip nasyonal Gwadloup nonm é fanm toujou ankous pou on kalifikasyon istorik pou on chanpyona di mond. On ripaj ki kay fèt an 2014 (An Polòn pou sé nonm-la é an Itali pou sé fanm-la).

Apré èsplwa a ékip nasyonal Matnik nonm ki éliminé Jamayik adan prèmyé tou éliminatwa a chanpyona di mond a volébòl - zòn NORCECA, nou konnèt dèpi yè, tout sé ékip-la ki kay jwé dézyèm tou-la. Ekip a nonm é fanm a ékip nasyonal Gwadloup sav aprézan kont ki moun yo kay bouwé lanné pwochenn.

Chanpyona di mond volébòl 2014

Eliminatwa - zòn NORCECA

2èm tou

Sé nonm-la

 Gwoup N

 Domnik

Ondiras

Grènad

Gwadloup

* Prèmyé + sé kat méyè dézyèm ékip a chak gwoup-la, ka kalifyé-yo pou twazyèm tou-la.

Sé fanm-la

 Gwoup L

 Senkis é Névis

Gwadloup

Gwatémala

Awouba

* Lédé prèmyé a chak gwoup ka kalifyé-yo pou twazyèm tou-la.

Chouk : www.norceca.net

Kanmarad, si zò pa té suiv prèmyé konsè a-yo lanné pasé, zò ké ratrapé-zòt oswè-la padavwa on gwoup a mizik a péyi Kongo kay bay on bèl réprézantasyon an vil Bémaho. Non a gwoup-la, STAFF BENDA BILILI. An pa ka maké plis, gadé é sitou kouté MIZIK!

Sa fèt! Dèpi yè, péyi Palèstin vin on léta manb obsèvatè a Òganizasyon a Nasyon Ini (ONU). I trapé 138 vwa pou, 9 vwa kont é 41 abstansyon. On bèl viktwa ba pèp palèstinyen! Sa ja on bon débi pou Palèstin vin manb apa-antyè a LONU. Mé natirèlman, on nouvèl kon sa pa fè plézi Etazini é Izrayèl. Sé dé péyi-lasa tèlman démokratik, yo désidé yo ké pini Lapalèstin. Yo pé mènasé si yo vlé mé Palèstin tini soutyen a on pakèt péyi asi latè.