-
Pawòl a moun kolonizé
"Métropole", "département" aprézan "l'été"! Mi pawòl a moun kolonizé an péyi-la! Chonjé avan jan gwadloupéyen té ka nonmé péyi-la ki ka dominé nou la "Lafwans". Blan-Fwans ki débaké an péyi an-nou enki ka mété-yo ka kriyé péyi a-yo "Métropole, métropole". Kifè alè, adan pwès tout gèl a gwadloupéyen ou ka tann "Métropole, métropole". An té byen anvi sav ola asi latè tini on péyi non a-y sé "Métropole"! Sa sé yonn!
Dé! Lè on moun ka kouté télé a fwansé, radyo a fwansé, gwadloupéyen ka woulé adan yo vlé pa menm nonmé Gwadloup "péyi". Yo adan on zafè a "département, département". Konté konmen fwa yo ka di sa adan jounal a-yo! Ni on jounalis fwansé ki té débaké pannan mouvman a 44 jou an-nou an 2009 an péyi an-nou. I té di : "Pourquoi un département ne serait pas un pays?". Non a-y Daniel Mermet a émisyon "Là-bas si j'y suis" a "France-Inter". "Daniel si tu savais comme mon peuple est malade!" Ah wi pou malad i malad menm! Sa sé dé!
Twa! Tèlman i malad, ni on ti-kouyon ki té ansyen prézidan a CCI Lapwent (zò sav ki moun) ki kréyé on zafè a "les universités d'été" an plen péyi Gwadloup ???? Gwadloup on péyi a chalè mésyé! Kifè an té ké mandé kloun-lasa ki tan i ké kréyé "les universités d'hiver" an Gwadloup osi? A pa kouyonnad?!!
Tags : peyi, metropole, fwans, nou, departement
-
Commentaires
E ben jistèman mi la pwoblèm-la yé! Gwadloupéyen ka kriyé Lafwans "Métropole" mé yo vlé pa kriyé Gwadloup "Koloni". An ka kwè kanmarad, gwadloupéyen ni dé chwa! Yo ka kriyé Lafwans "Métropole" é an menm balan-la yo ka kriyé Gwadloup "Koloni" oben si yo vlé pa kriyé Gwadloup "Koloni", kriyé Lafwans pa non a-y kivédi "Lafwans". Zafè a kriyé Gwadloup "département" sé on masko padavwa Gwadloup ka kontinyé maché kon on koloni!
Kanmarad, ou sav ki jan yo ka kriyé péyi an Karayib-la ki poko koupé kòd-la èvè Langlètè? Koloni anglé! E sala pa ka pozé moun pon kalté pwoblèm!
3Kanmarad ARYMercredi 4 Mai 2011 à 23:304Soldat_GwadaJeudi 5 Mai 2011 à 03:275Kanmarad ARYJeudi 5 Mai 2011 à 08:58Adan koloni-Gwadloup an vwè an télé ayo yo koupé on manman pyé bwa santènè a grankan zabim...yo di sé pou sékirité a moun swadizan yo fè sa !
Ps: Nèg ka maché si tèt ? NOU pa konprann Solda Gwada...
Wi an vwè sa osi! On pyébwa ki té ni plis ki 100 lanné boug an-mwen! On pyébwa ki té la lontan avan nou é ki té ké la lontan apré nou! Swadizan pou on zafè a sékirité! Ki jan gwadloupéyen poko konpwann a pa nati-la ki dwèt adapté-y a nou mé sé noumenm ki dwèt adapté-nou a nati-la? Moun ka di pyébwa-la yo koupé la ké sèvi pou fè mèb! A pa kouyonnad alò?!! Chonjé lézansèt, avan yo té koupé on pyébwa an zayann-la, yo té ka mandé pyébwa-la padon! E an pa'a kwè zabim yo fè sa!
An ka suiv sa Sòlda Gwada té vlé di! Ou ni rézon a-w Sòlda Gwada, nèg ka maché si tèt menm! Ki jan yo poko jen konpwann nou asi latè pou nou pa rété anba grenn a blan? Nou tout sé nonm asi latè! Blan-la ka fè zafè a-y adan lentéré a-y, menm biten pou zendyen é chinwa. Sé nou nèg ki poko jen konpwann sa? Ki jan ou pé konpwann gwadloupéyen pa ka vwè yo ka viv adan on péyi ki ta-yo? Pou yo Gwadloup sé on réjyon a fwansé!
7Kanmarad ARYJeudi 5 Mai 2011 à 15:16An paté konèt twôp èsprésyon-lasa ki vé di kanmarad alè an konprann mannyè ou pôté lèsplikasyon...mèsi onpil !
Ajouter un commentaire
E poukwa pa métwopôl kanmarad ? si Gwadloup sé on koloni...
Pétèt ou ké èspliké mwen !