Gaby, Rémon, Eli, twa mèt a mannyòk léta kolonyal fwansé

bizwen koupé tèt a-yo!

Sanmdi pasé, an lari Lapwent, konbat, militan a LiGTG té ka distribiyé trak an tout lari Lapwent ola yo ka èspliké pèp-la sitiyasyon sendikalis ka viv an menm a lenjistis kolonyal fwansé an péyi an-nou. On bèl trak ki ka pwès sanm on ti-jounal ola adan kouvèti a-y yo mèt foto a sé militan-la. Zò ka vwè foto a Eli Domota, Gaby Clavier, Rémon Gauthiérot é dòt kanmarad ankò. Tou sé militan trapé on kondanasyon a lenjistis a-yo! Pou léta kolonyal fwansé an péyi-la, sendikalis sitou moun a LiGTG sé délenkan. Mé politisyen magouyè, patron volè, yo pa adan! Sé pou sa an toujou ka di zafè a kominikasyon-la fondal an péyi an-nou. Sé pwofitan-la, yo ni télé a-yo, radyo a-yo, jounal-papyé a-yo pou fè gwadloupéyen bwè dlo mousach pou lèt. Mé LKP ki ni 48 òganizasyon doubout oka an péyi-la ni on kominikasyon dirèk èvè pèp-la!

Lagwadloup sé tan-nou! Lagwadloup a pa ta-yo! Yo pé ké fè sa yo vlé adan péyi an-nou!