18 novanm 1985 - 18 novanm 2010, kay fè 25 lanné mésyé, on ka-syèk on jandam rèprézantan a léta kolonyal fwansé té ka ASASINE on jenn gwadloupéyen, non a jenn-lasa Charles-Henri Salin! Jenn ti-boug-lasa té lékòl lisé Baimbridge. Jou-lasa, i té sòti sinéma é i té kay rantré a kaz a-y. E sé pannan i té ka pwan chimen a kaz a-y i kontré manblo! Kay pasé? Sa nou konnèt sé on jandam Michel Maas tiré dèyè do a jenn ti-boug-lasa. An moman-lasa yo té ka chèché on brakè mé konm pou yo tout nèg sé nèg alò sé kalté blan-lasa pa jen ka réfléchi avan yo pété bal asi moun! Jistis a-yo fè pèp-la kwè yo té baré jenn gason-la Bwasa alò kè yo kyouyé-y owa CHU-la Chovèl. Jistis a-yo touvé tout dyab é sé kòn pou yo té lagé jandam asasen-lasa! On jandam yo dékoré é ki alè ka bwè dlo a-y an péyi a-y!

25 lanné apré, nou ké lésé zafè-lasa pasé?

25 lanné apré, mouvman kiltirèl AKIYO ka fè pèp Gwadloup chonjé kyouyézon-lasa. Sa kay komansé jòd-la èvè on bokantaj a pawòl adan lokal a AKIYO menm é demen  yo ka envité tout mas kiltirèl déboulé an lari Lapwent èvè on tèm asi Réprésyon.