Sa té bèl toubòlman gwan sanblé a pèp Gwadloup douvan bik a LKP yè swa Lapwent! On miting ki komansé owa huitè mwen dis, èvè misyé Raymond Gama ki prèmyé bay lavwa. E sé kon sa, gras a téléfòn pòtab a mòso fè-la, misyé Eli Domota ki vin jwenn  misyé Gama, gwadloupéyen rivé lyanné èvè on rèprézantan a péyi Mayòt. Sé èvè onlo émosyon rèprézantan a Mayòt ba pèp Gwadloup tou sa ka pasé an péyi a-y. On grèv jénéral kont lavi chè ki kay rantré adan katriyèm simenn a-y lendi pwochen! Van a LKP pati an 2009 pou fè lantou a latè. Zò pa'a tann!

Apré sé misyé Alain Plaisir ki vin douvan mikro-la pou ba pèp Gwadloup lèsplikasyon asi "politik" a on gwan magazen a manjé an réjyon Bastè "Casino" pou pa nonmé-y! On magazen swadizan laréjyon Gwadloup achté sé masòn-la pou swadizan fè gwadloupéyen achté méyè maché. Biwo Etid Ouvriyé (BEO) montré moun jan magazen-la ka fè pwofitasyon anlè tèt a pèp-la. Dayè yo té ka vann jounal a BEO an bik-la yè swa pou 1 éwo!

Apré sé on rèprézantan a FO ki palé asi zafè a béké ka dérèspété travayè Gwadloup an péyi a-yo.

Ansuit, sé té tou a on rèprézantan a LiPLG misyé Jean-Marc Galice ki di pèp-la déchoukaj a pwofitasyon pé pa fèt si nou pa ka menné on konba politik.

Garcin Malsa ki sòti an péyi a-y Matinik voyé ba pèp-la tout fòs-la nou bizwen la pou nou gawoulé kont sé kriminèl béké-la. Dayè Garcin Malsa mèt an wout osèryé asi sé moun-lasa.

Misyé Joel Beaugendre a sendika SPEG limenm a-y palé asi on lékòl nou dwèt mofwazé adan on lékòl Gwadloup.

On dézyèm rèprézantan a péyi Matnik vin douvan mikro-la. On avoka yo ka kriyé Man Duhamel. E la, i fè fò menm! I fouté dèyè sé béké-la! Apré tout pèp-la té oblijé rété lontan ka bat lanmen tèlman sa té fò.

Man Natalie Minachy a GAP Gwadloup milité pou gwadloupéyen manjé sa ki ta yo. zafè a sik sé béké-la ka fouté adan bwason yo ka vann adan sé dènyé koloni-la, plis ki janmen ka bay rézon.

E miting-la bout kon a labitid èvè mòso fè-la misyé Eli Domota. La, i mèt an wout asi onlo biten ka fèt an péyi-la.

Aprédavwa pèp-la chanté "Lagwadloup sé tan-nou", moun rantré a kaz a-yo. I té onzè mwen ven. On bèl, bèl, bèl miting, kon a labitid!