Sé gwadloupéyen ka fouyé tè an péyi a-yo?

Yè swa andidan télévizyon a-yo, yo montré moun ka fouyé tè adan on sèksyon a komin Gozyé. Moun ka fouyé tè pou yo pé sav dékouvè biten ansyen séré adan-y, yo ka kriyé sa akéyològ. Ki moun ka fouyé tè an péyi Gwadloup? A pa gwadloupéyen! Sé moun ka sòti lòtbò, moun ka sòti an péyi Fwans! Pa ni gwadloupéyen ka fè étid an larè-lasa? Sa byen bèl nou chanté Lagwadloup sé tan-nou mé si sé pou nou lésé dòt moun fè tout biten an plas an-nou an péyi an-nou ki tan-nou, an ka di an pa dakò! On pèp ki pa ka kontrolé ayen an péyi a-y pa on pèp!