Antrénè ka véyé konbatan a-yo

Ekip nasyonal a taèkwondo Gwadloup té voyé dé konbatan adan US OPEN an vil Las Vegas an péyi Etazini. Non a-yo, manmzèl Perle Miny (jinyò -42 kg) é David Emmanuel Thézénas (sényò -54 kg). Yo toulédé pa rivé pasé prèmyé tou-la.

Perle Miny pèd douvan amérikenn-la Junious Kelsey 12-6. Amérikenn-lasa té trapé on méday dè bwonz adan dènyé jé panamériken-la é sé'y an final dè kont ki gannyé US Open-la adan katégori a-y. Alò nou pé konsidéré Perle Miny té tonbé anlè on gwo mòso fè.

David Emmanuel Thézénas li kant a-y tonbé douvan on dòt mériken, non a-y Oscar Ramirez. Aprédavwa i té pwan douvan pannan dé minit, Thézénas pèd pyé pou'y pèd 7-2.

Nou pa pasé prèmyé tou-la mé sa pa grav pas nou la pou nou apwann. Fò pa nou obliyé sé enki lanné pasé Gwadloup fè rantré ofisyèl a-y adan fédérasyon mondyal a taèkwondo. E piplis ankò, adan US Open-lasa, onlo konbatan ka paré-yo pou pwochen jé olenpik-la ki kay fèt London an Anglètè an out.

Pwochen gwan randévou pou taèkwondo Gwadloup, sé chanpyona di mond jinyò ki kay fèt an Ejipt (4 jis 8 avril).

Gwadloup, i adan lèmond, an di zòt!