On bon, bon, bon nouvèl ba èspò Gwadloup! Wi sè é fwè Gwadloup, péyi an-nou èvè kat dòt péyi kon Matnik, Wannda, Touvalou é Zil Kouk rantré dèpi sanmdi pasé adan fédérasyon enténasyonal a taèkwondo! Sa fèt a linanimité an péyi Koré di Sid ki sé fyèf a taèkwondo-la! Kivédi sè é fwè Gwadloup, péyi an-nou ké pé ay adan on chanpyona di mond!!! Kon péyi Fwans é kon nenpòt ki péyi asi latè, on konbatan Gwadloup ké pé fasadé èvè chinwa, iranyen, sénégalè oben pannyòl adan on chanpyona di mond.

On bon nouvèl padavwa nou ka èspéré vwè taèkwondo-la chayé sé lézòt èspò-la adan siyaj a-y. Alò nou pa ka pèd lèspwa vwè foutbòl an-nou, baskèt an-nou, atlétizm an-nou, bòks an-nou, hannbòl an-nou, volébòl an-nou, siklizm an-nou é tout dòt kalté èspò rantré adan fédérasyon entènasyonal.

On kèsyon! Lè péyi Gwadloup ké ay adan pwochen chanpyona di mond a taèkwondo, èvè ki drapo i ké ay?