Si adan CARIFTA an atlétizm nou lwen dèyè Jamayik, an natasyon sé plito lèkontrè. Wi, nou pé bat fal an-nou padavwa ékip nasyonal Gwadloup krazé CARIFTA-la an péyi Bahamas. Jenn an-nou trapé...65 méday léfwè!!! On rèkò! Nou ralé 25 an lò, 19 an awjan é 19 an bwonz.

Èvè 821,50 pwen, Gwadloup ka dèvansé Bahamas 657 pwen é Trinidad and Tobago 648 pwen.

Mé ankò on fwa kon pou atlétizm-la é dòt èspò ankò, Gwadloup pé pa ay pli lwen pas si on jenn vlé fè chanpyona di mond oben jé olenpik, i oblijé pasé pa Lafwans. Wi, i ja lè pou chanjé sitiyasyon-lasa!

Pwochen édisyon-la ké fèt lanné pwochenn an péyi Jamayik.