Magré tousa yo té di ba pèp an-nou lanné pasé ola béké mèt a pwofitasyon an péyi Gwadloup, menm pèp-lasa on lanné apré, ka kontinyé menné lajan ba sé béké-lasa. An dwèt ka kwè on bon pati a pèp an-nou kontaminé! Yo tèlman kontaminé, yo vin zonbifyé! Sa ka fè mwen chonjé on film ni lontan an té vwè, on film on mériken té fè, non a film-lasa sété "Zombies". On film ki té trapé onlo siksè lè'y té sòti an 1978. On film ki ka palé-w dè moun on maladi kontaminé é ki mofwazé an zonbi. Yo ka montré-w an film-la jan sé zonbi-la ka anvahi on sipèrmarché pou yo pé sav manjé sé vivan-la. Adan film-la yo ka rakonté jan sé zonbi-la gadé menm labitid yo té ni an sipèrmarché-la lè yo té vivan. Zò pé vwè-y adan vidéo-la, sé zonbi-la ka alé é vini adan sipèrmarché-la. Sé la yo té ka pasé tout tan a-yo lè yo té vivan!

Alò film-lasa ka fè mwen chonjé gwadloupéyen! Kon zonbi, gwadloupéyen ka alé é vini adan gwan magazen a Hayot é Despointes, yo ka pasé tout vi a-yo adan sé magazen-lasa! Adan film-la, yo ka montré jan sé vivan-la ka sèvi èvè zarm kont sé zonbi-la mé nou an péyi Gwadloup, sé on dòt kalté zarm pou nou sèvi, on zarm a konsyantizasyon pou nou dézonbifyé gwadloupéyen! E wi kanmarad, misyé Georges A. Romeo san sav fè film-lasa ba gwadloupéyen!

Adan sé zonbi-la, zò ni ka ranplasé sé blan-la pa sé nèg-la, zò ka enki bokanté yo plas é zò ké ni gwadloupéyen ka alé é vini adan sipèrmarché a sé pwofitan-la!