Kon manman toujou ka di mwen, nou té dwèt ni on "la route du rhum" chak mwa! Poukisa? Sé padavwa prèmyé fwa an vwè on minisipalité kon Lapwent pòté mannèv pou kiré on laplas kon sa! Wi mésyézédam, zòt ki an péyi-la, zò pé konstaté jan Laplas Laviktwa vin pwòp. Sa nòmal padavwa mèt a-yo kivédi sé blan-la ka òganizé on kous a bato. Non a-y "la route du rhum". Sé menm biten ki "Paris-dakar" a-yo la, on kous a loto é moto éwopéyen té ka fè an Afwik. Sé mésyé té ka salòpté tè a zansèt an-nou èvè kous a loto a-yo, kyouyé déotwa nèg an chimen kon on loto ka kyouyé on chyen. Mé sa yo pa té prévwa sé Al-Qaida té ké fann kyou a-yo! Kifè éwopéyen té oblijé ay fè "Paris-Dakar" a-yo an Amérik di Sid! Alò pou nou wouvin an péyi an-nou, éwopéyen ka fè on kous a bato ki pa ka menné anmèd ba péyi-la. Sa ki pli bèl la, déotwa nèg kontan pas yo ka pansé yo adan on tan! Konmen tan blan ké kouyonné nou kon sa ankò? Si a pa té kous a-yo la, nèg-la té ké rété viv an malpwòpté Laplas Laviktwa! K...a m...on mè!

Maré sé nèg, i pa ka konsèvé! Rivyè sé milat, i pa ka konsèvé! Blan sé lanmè, tout ka rété!