Kanmarad Domota é LKP

ka ba pèp-la mo pou janvyé

2011!

17 désanm 2008 - 15 désanm 2010! Sé dé dat-la ni on pwen komen! Wi kanmarad, 16 é 17 désanm 2008, on mouvman yo té kay kriyé plita LKP té désidé kontré rèprézantan a léta kolonyal fwansé pou yo palé asi pri a ésans-la. Pannan sé dé jou-lasa, rèprézantan a léta fwansé pa jen réponn kolèktif-la! Rézilta, on jou 20 janvyé 2009, on gwan manman mouvman té ka démaré an péyi-la, on mouvman a 48 òganizasyon, yo kriyé LKP! On mouvman ki diré 44 jou jistan gouvènè a léta kolonyal fwansé, politisyen bwabwa Gwadloup èvè lèpatrona té signé on akò èvè LKP on jou 4 mas 2009. Mé avan, on akò entèpwofésyonèl té ja signé an bout a mwa févriyé, on akò yo kriyé "akò Bino" an mémwa a on sendikalis a CGTG é tanbouyé a AKIYO ki mò asasiné sité Henri IV Lapwent.

Dé lanné pasé é léta fwansé, politisyen bwabwa Gwadloup èvè on pati a lèpatrona pa ka rèspèté sé akò-la yo signé èvè LKP! E sé kon sa yè é jòd-la, LKP désidé kon an 2008 kontré rèprézantan a léta kolonyal fwansé. E kon an 2008, rèprézantan a léta kolonyal fwansé rèfizé kontré LKP. Alò LKP ka ba pèp Gwadloup mo an janvyé pou on gwan manman mobilzasyon jénéral kon an janvyé 2009. Dèmen swa ni on miting owa bik-la Lapwent alò nou ké ni plis présizyon anlè sa!

2011 = 44 jou? Nou ké la pou vwè! Kon yo ka di an péyi-la : "La'y pann i sèk!".