-
Koup dafwik : Giné Ekwatoryal kalifyé, Sénégal éliminé!!
Koup dafwik 2012 an péyi Giné Ekwatoryal é Gabon
Gwoup A : Prèmyé fwa Giné Ekwatoryal té ka jwé on faz final a on koup dafwik, mi'y ja an kadèfinal aprédavwa i gannyé dézyèm match a-y. E a pa douvan nenpòt ki ékip i fè-y, i fè-y douvan finalis a édisyon 2002-la é kadèfinalis a lakoup di mond 2002, kivédi Sénégal. On ékip ki pa té pèd pon match adan sé faz éliminatwa-la, on ékip onlo èspésyalis té ka konsidéré kon yonn adan sé favori-la pou gannyé koup dafwik-lasa. Sa senten sé on gwan manman désèpsyon pou sé lyon a Téranga-la ki sé dézyèm non a ékip sénégalèz-la. Sénégal ké jwé twazyèm match a-y douvan Lalibi pou lonè.
Adan dézyèm match a gwoup A-la é asi on téren ki pwan onlo dlo apré on manman lapli tonbé, Zanbi é Libi kité yo asi on mak bita bita (2-2). Balotaj favorab ba ékip Zanbi ki té gannyé prèmyé match a-y douvan Sénégal (2-1). Libi ki té pèd prèmyé match a-y (0-1) douvan péyi òganizatè-la Giné Ekwatoryal ké éséyé woulansé-y douvan Sénégal ki ja éliminé.
Woulo ba Giné Ekwatorayl!
Tags : douvan, senegal, match, gine, ekip
-
Commentaires