• Kòtdivwa pa ka rivé, Zanbi chanpyon!

    http://upload.wikimedia.org/wikipedia/fr/thumb/e/ea/CAN_2012.png/220px-CAN_2012.pngJénérasyon a labann a Drogba é Kolo Touré pé ken chanpyon dafwik? Apré final-la Kòtdivwa té pèd douvan Léjipt an 2006, i ka woupèd on final douvan zanbi. I pèd sé final-la adan séri a pénalti. Didier Drogba raté on pénalti pannan match-la menm, Kolo Touré é Gervinho raté ta yo adan séri a pénalti-la. Twa méyè jwè a Kòtdivwa raté pénalti a-yo! Sa ka byen montré moun an foutbòl, ayen pa senten. Kòtdivwa pa pèd pon match adan koup dafwik-la. Pli bèl-la, i pa pwan pon bi é magré sa, i pa chanpyon dafwik! Sé dwèt prèmyé fwa moun ka vwè sa adan on gwan ripaj foutbòl. Finalman sé Zanbi ki rivé kochi bèk a Kòtdivwa apré i té ja kochi bèk a Gana, on dòt gwan favori a tounwa-la, an dèmifinal. Apré dé final i té pèd an 1974 douvan Zayir é an 1994 douvan Nijérya, Zanbi ka gannyé prèmyé koup dafwik a-y. Èvè viktwa-lasa yo ka rann on bèl omaj ba ékip-la ki té mò adan on aksidan avyon Libreville menm an avril 1993. Moun ka kwè an lèspri dwèt ka di sé sé moun-la ki pèd vi a-yo la ki fè ékip nasyonal Zanbi gannyé koup dafwik-la. Finalman an byen kontan ba yo padavwa apré on nasyon konnèt lapenn é tribilasyon, fò'y jwenn èvè kontantman! Zanbi ké chanpyon dafwik pou on lanné davwa i kay woumèt tit a-y an jé lanné pwochenn menm an péyi Lafwik di Sid. E la labann a Drogba é Touré ké trapé on dènyé chans pou yo chanpyon dafwik.

    Adan match pou twazyèm plas-la, sé Mali ki gannyé douvan Gana 2 bi a 0.

    Koup dafwik 2012 an péyi Giné Ekwatoryal é Gabon

    Match pou twazyèm plas-la

     Mali - Gana 2-0

    FINAL-LA


    Zanbi - Kòtdivwa 0-0 ap.pwol. (8 pén. a 7)

    * Zanbi chanpyon dafwik 2012.

     

     Si on moun ka soufè èvè kè, pa gadé sé kalté biten-lasa!


    Tags Tags : , , , ,
  • Commentaires

    1
    ARY x
    Vendredi 17 Février 2012 à 10:39

    E wi, Zanbi kòchi bèk a kòtdivwa...o pénalsi ! Nou sav kon kanmarad-la ka di, fè pa ou ka soufè avè kè. Ni osi on pousantaj a chans andidan biten-lasa. A pa toujou méyè ékip-la ka gannyé, mi sé sa an vlé di.

    • Nom / Pseudo :

      E-mail (facultatif) :

      Site Web (facultatif) :

      Commentaire :


    Suivre le flux RSS des commentaires


    Ajouter un commentaire

    Nom / Pseudo :

    E-mail (facultatif) :

    Site Web (facultatif) :

    Commentaire :