Fò nou fè yo rèspèté tanbou

Gwadloup!

Asi bik entèwnèt a jounal "Fwansmanti", an jété on kouzyé davwa fò nou toujou jété on zyé aka lèlmi é an ka dékouvè moun ka di bétiz ankò on fwa anlè mès é labitid a pèp Gwadloup. Jounal-la té ka palé asi èspozisyon a fwè-la Yves Thôle ; sé moun-la mété-yo ka di bétiz anlè tanbou an-nou!  Ou pé senten sé moun-lasa sé fwansé! Aprédavwa yo mal palé kréyòl an-nou, yo mal palé kat lidantité nasyonal Gwadloup FKNG mété si pyé, yo dèyè gwoka an-nou pou di bétiz!  Ba sé moun-lasa tanbou Gwadloup pa kilti sé on fòlklò. Mé nou ja konnèt! Ba sé moun-lasa pé pa tini on kilti nèg an Gwadloup padavwa pou yo péyi-la sé ta-yo! Magré nèg an majorité an Gwadloup mé yo ka touvé lèmwayen pou di Lagwadloup sé enki ta-yo! Gadé wòl a-yo aka sé kanak-la! Kant a an Afwik, pa menm palé! Lè sé blan-la ka vin enstalé-yo aka nèg yo sé mèt é sényè! Natirèlman a pa tout sé blan-la ki kon sa mé bon enpé adan yo! Lè'w ka débaké aka on moun, fò'w rèsptè mès é labitid a-y! Tini blan ka fè-y mé tini osi bon enpé ka dérèspèté péyi-la!

Mé nou ké kontinyé woulé asi mès é labitid a pèp Gwadloup, ki yo vlé, ki yo vlé pa!

Lagwadloup sé tan-nou! Lagwadloup a pa ta-yo! Yo pé ké fè sa yo vlé adan péyi an-nou!