-
Kay ka pasé an Afwik?
Fwansé kyouyé boug a-yo
an péyi Nijè!
Lòtjou moun té ka palé asi sa ki pasé apré élèksyon té fèt Kòtdivwa. On élèksyon otila dé boug déklaré-yo prézidan a péyi-lasa. Non a-yo Laurent Gbagbo é Alassane Ouattara. Yonn vlé pa lagé ba lòt! Mé nou ja konnèt! Laurent Gbagbo pa moun a Lòksidan ankò alò Lòksidan èvè fwansé an tèt a-y bizwen fè misyé Gbagbo pati é mété Ouattara an plas a-y. Lòksidan ni labitid fèt é défèt gouvèlman an Afwik!
An Tinizi, pèp-la komansé lévé gawoulé kont gouvèlman a péyi a-y! Répons a gouvèlman tinizyen-la sé tiré bal fizi anlè pèp-la! On pakèt moun ja tonbé anba bal a sé mésyé! Tinizi on péyi ki po'o jen rivé fè on démokrasi osèryé! Prézidan a Tinizi Ben Ali di pèp a-y, i kont lavyolans é i ké éséyé lagé asi réprésyon-la. Pawòl an bouch pa chaj!
An péyi Nijè alè, léta fwansé ka pléré penn a-y davwa dé boug a-y té ké mò aprédavwa yo té disparèt an vil Nyamé kapital a péyi-la. Yè Al-Qaida rèvandiké rapt a sé dé fwansé-la tousèl é i pa jen di i kyouyé sé dé fwansé-la! Mé sa yo vlé pa di nou la, sé larmé fwansé limenm a-y ki kyouyé sé dé boug-lasa!
Tags : peyi, fwanse, boug, tinizi, pep
-
Commentaires
Sé sa menm kanmarad é étopsi ayo menm ka di yo-y ! Sé yo menm ki tchoué konpatriyôt ayo pa érè
An tinizi jénès a péyi-la menm mèt an wout oséryé si misyé Ben ali-la diktatè ki té ja di i té ké pati an 2014 mé lè i vwè safè cho i ay échwé jis an arabie saoutite
I parè lôksidan(fwansé é oni) pa vlé Gbagbo ankô ki li menm-ay anti-kolonyal yo simé fiti diktatè Ouattara ki ansyen adjwen FMI pou mété pèp ivwaryen pli an misè é édé yo a volé rèsous a péyi-la