Kanmarad, ès zò ka chonjé asi lòt blòg an-mwen la, an té voyé on biyé ola an té ka di nou tini on moun similé kon pa tini? An pé ké nonmé non a-y mé si zò ka chèché byen, zò ké touvé. An 2008 pou chanpyona Ewòp-la, on gwadloupéyen mofwazé an fwansé té monté on klèb a sipòtè a ékip fwansé an plen Gwadloup. An pa'a di moun pa sipòté ékip foutbòl fwansé mé zafè a santi-w pli fwansé ki fwansé-la, an pa dakò! Boug-lasa té touvé mwayen mété on kat a Lagwadloup anlè on drapo fwansé. Sé pou di zòt ki jan asimilasyon-la kay adan péyi an-nou. Lanné-lasa Lafwans pa té fè ayen dayè adan tounwa-lasa.

An 2010 nonplis pou koup di mond-la.

An 2011, yo ka fè sòti anba fèy, on zafè a kota. An réyalité twòp nèg adan ékip a-yo!

An 2011, nèg-lasa ki té ka santi-y pli fwansé ki fwansé-la, woutouvé an ka kwè léta nòmal a-y  I désidé alè sipòté ékip nasyonal Gwadloup.

Pèp-lasa ké toujou ban mwen-y. Lè van-la ka touné, yo ka dékouvè yo sé gwadloupéyen!