An déwò jouné a rèkèyman aka fanmi Geoffroy, yè tribinal a-yo Lapwent té ka kriyé on dénonmé Sylvie Hayot aprédavwa i té kriyé ponpyé ki té vin pòté-y soukou apré on aksidan sal nèg. Natirèlman konbatan a LKP té a lendikatif prézan èvè mòso fè-la misyé Eli Domota. Lè fwansé vwè on mobilizasyon osèryé komansé fèt douvan tribinal-la, yo pa ay pli lwen é yo désidé voyé zafè-lasa pou 22 désanm. E lè 22 désanm ké rivé asiré pa pétèt, yo ké wouvoyé-y pou on dòt jou ankò. Nou ja konnèt èvè lajistis fwansé, sé jwé yo ka jwé èvè moun!

On dòt zafè ki rivé an péyi-la. On manblo minisipal asi komin Manten, désidé mété on PV ba prèmyé mè ajwen a komin-la. Pou ki sa? Sé padavwa loto a mè-lasa té garé anlè on koté pou moun andikapé.  Ka'y té rivé manblo-la fè sa? Mè ajwen-la pa pwan sa! i jiré manman manblo-la! I chiré PV-la! I voyé-y an figi a-y. Li èvè mè-la désidé konvoké-y pou yo di-y fò pa i woukomansé si-y vlé kontinyé woulé ba komin-la. Kanmarad, an toujou ka di zòt lèpouvwa, sé on biten moun dwèt apwann é an ka kwè ni déotwa politisyen ki poko paré pou sa! A pa padavwa ou sé on mè adan on komin, ou ka konpwann ou ké fè nenpòt ki biten!

On dòt biten ankò! Prézidan a fédérasyon foutbòl fwansé an péyi an-nou. Li èvè on délégasyon a lig foutbòl Gwadloup èvè osi déotwa politisyen, ay asi on téren a komin Ti-Bou ola yo ni lentansyon mété on piti "Clairfontaine" kivédi on sant a fòmasyon a jenn foutbalè Gwadloup. On sant réjyon Gwadloup kay finansé a 100%! Zò byen li-y, a 100 %! Woy, woy, woy! Fò kwè lajan laréjyon ka koulé pli vit ki on rivyè! Lajan an-nou padavwa pou enpo é taks yo ka fè nou péyé, sa pa posib!