Chat é rat an konplosité adan kaz a pèp Gwadloup.

An ka èspéré zò rété kouté, kouté pou zò kopnpwann sa Wobè té vlé di adan son-la an voyé ba zòt la? Nòmalman on chat fèt pou manjé rat mé chat-la, olyé i manjé rat-la, i ka tété rat-la. E an menm balan-la, rat-la ka tété chat-la osi! Kifè yo toulédé adan on konplosité adan kaz a misyé Wobè! Alò mésaj-la pou nou pèp Gwadloup, mimi-y! Jòdi-jou nou tini sa LKP é pèp Gwadloup kriyé pwofitasyon. On sistenm ola politisyen an péyi an-nou an konplosité èvè sé pwofitan-la, kivédi politisyen bwabwa an konplosité èvè kapitalis pwofitan é kolonyalis fwansé! Nòmalman politisyen té dwèt défann pèp a-yo kont pwofitan kapitalis é kolonyalis, kon on chat té dwèt défann on moun kont rat ka vin  anvayi kaz a-y! E nou ka konstaté chat (politisyen bwabwa an-nou) ka tété sé rat-la (sé pwofitan-la) asi do a pèp Gwadloup! An bout a son-la, Wobè ka di nou, fò nou gwadloupéyenn nou mèt-nou dakò, fò nou viv an fanmi kon chat (politisyen) é rat (sé pwofitan-la) ka viv an fanmi! Sa kivédi, fò sendika é patron Gwadloup fè on lyannaj osèryé kont politisyen é pwofitan kapitalis é kolonyalis. Menm si yo pa ni menm entéré, sendika é patron Gwadloup tini menm lèlmi-la, chat (politisyen) é rat (sé pwofitan-la). Chat é rat ki an konplosité adan kaz a pèp Gwadloup!