An bout a simenn pasé on siklòn yo bay non "Tomas" watibwazé déotwa ti-lilèt an Karayib-la.Siklòn-lasa vansé asi Matnik, Sentlisi é Senvensan mé tala ki pwan plis yann la, sé Sentlisi. On péyi lontan i pa té ko konnèt on siklòn kon sa. Onlo pyébwa tonbé, fètay a moun chalviré, chimen krazé...Malérèzman a pa krazé sikòn-la enki krazé Sentlisi, i kyouyé moun osi. On bilan ki poko bout ka bay 18 mò é yo po'o touvé rèstan moun labou-la téré. Alèkilé sé solidarité èvè sé lilèt-la ki dwèt jwé. Nou ja konnèt, déotwa kanklo an péyi an-nou ké sòti an gèl a-yo bétiz asi sé lilèt-la mé fò pa nou jen obliyé jou a malè pa ni kenbwa! Chonjé siklòn Igo! On siklòn ki té watibwazé péyi an-nou, moun rété lontan san yo touvé on kaz sèryé pou yo té mété anba tèt a-yo! Zoranj menm, pannan lontan, sé zoranj Domnik gwadloupéyen té ka manjé!