Yè swa, toutmoun dwèt vwè-y andidan télévizyon a-yo. Jounal a "Guadeloupe 1ère" té envité prézidan a Lig Foutbòl Gwadloup (LGF) misyé Jozèf Séné. Li èvè prézidan a lig foutbòl Matnik, Giyàn é osi rèprézantan a foutbòl Senmawten té an péyi Matnik lòtjou ola yo tou létwa té ka fasadé an péyi Matnik èvè dirijan a laCONCACAF, laFIFA é Fédérasyon Foutbòl Fwansé. On fasadaj ola yo té ka palé asi rantré a Gwadloup, Matnik é Giyàn laCONCACAF konm "full members" kon yo ka di an anglé. Kivédi, yo ké ni menm dwa é menm dèvwa ki nenpòt manb a laCONCACAF. Sa kivédi osi, Gwadloup, Matnik, Giyàn, Senmawten (é asiré pa pétèt Sinmawtin) ké jwé éliminatwa a lakoup di mond kanmarad! Jou 19, 20 é 21 avril pwochen,  kongré a laCONCACAF ké fèt an péyi Panama an menm moman a chanpyona a laCONCACAF a sé mwen 17 lanné-la ki ké fèt an péyi-lasa menm. Apré bèl lèsplwa a Lagwadloup adan Gold Cup 2007 (I té rivé an dèmifinal), an ka kwè laCONCACAF oblijé fè-y rantré konm "full member" é an menm balan-la, laFIFA osi. Wi kanmarad, nou pé di sa jòdi-la, Fédérasyon a Foutbòl Fwansé lésé-y pyéjé-y padavwa laCONCACAF chanjé èstati a-y. I ka pwan enki "full members" andidan a-y! Kon yo ka di, rèv-la ka vin on réyalité!

Plis ki janmen lotonomi a èspò Gwadloup ka pwan douvan padavwa apré taèkwondo-la é volébòl-la sé tou a foutbòl-la mé osi ta hannbòl-la. Dayè nou ké palé asi hannbòl-la adan on dòt biyé. On lotonomi adan èspò-la ki kay jwen lotonomi politik a péyi annou.

Zò pé lyanné-zòt asi bik entèwnèt a laCONCACAF

http://www.concacaf.com/page/AssociationNewsDetail/0,,12813~3060085,00.html