-
Gold Cup-la ka démaré dimach
Myé ki an 2007?
Ekip nasyonal an-nou ka pati dèmen maten sanmdi pou'y pwan chimen a péyi Etazini ola on gwan ripaj kay démaré dimanch. Non a-y CONCACAF Gold Cup. Sé ké twazyèm fwa péyi Gwadloup kay adan konpétisyon-lasa. An 2007, nou té rivé an dèmifinal é an 2009, nou té arété-nou an kadèfinal. Pou lanné-lasa nou kay férayé mawdi 7 jen ka vini la douvan Panama nou té gannyé 2-1 an poul an 2009. Dézyèm match an-nou sé ké sanmdi 11 jen douvan Kanada on ékip nou ja kontré é nou té gannyé 2-1 toujou an poul mé an 2007. Pa kont sé ké prèmyé fwa nou kay fasadé èvè ékip nasyonal Etazini yonn adan sé gwan favori-la èvè Mèksik é Kòstarika. Gwan match-lasa sé ké mawdi 14 jen.
Yè sé ti-boug Gwada-la jwé on ti-match zanmi douvan Fort Lauderdale on ékip a dézyèm divizyon a chanpyona mériken. Nou pèd 1-0 mé a pa té rézilta-la ki té ka konté. Malérèzman sété sèl match préparasyon yo jwé. Ès sa ké sifi? Nou pa sav! Mé an pé di zòt, pisimyé nou pèd yè ki mawdi pwochen. Davwa biten sèryé-la kay démaré jou-lasa an vil Detroit.
Match Gwadloup - Panama, sé ké mawdi a sizèd'swè douvan pòs a télé a-zòt oben douvan entèwnèt.
Gold Cup-la ka démaré dimanch an vil Dallas èvè dé match : Kòstarika - Kiba é Mèksik - Salvadò
Final-la ké jwé sanmdi 25 jen an vil Los Angeles.
CONCACAF GOLD CUP
Gwoup A Gwoup B Gwoup C
Mèksik Ondiras Etazini
Kòstarika Gwatémala Kanada
Salvadò Jamayik Panama
Kiba Grènad Gwadloup
PALMARÈS-LA
1991 : Etazini
1993 : Mèksik
1996 : Mèksik
1998 : Mèksik
2000 : Kanada
2002 : Etazini
2003 : Mèksik
2005 : Etazini
2007 : Etazini
2009 : Mèksik
2011 : ?
Pou plis kamo, lyanné-zòt asi Boul an Karayib-la asi caribbeanfoot.overblog.com
Tags : nou, etazini, 2009, meksik, match
-
Commentaires
Mwen, an pa étoné dè désèpsyon a misyé Guy Roch davwa chonjé an 1946, yo fouté nou dépawtèman fwansé, kivédi lasimilasyon. Kifè alè, nou toujou tini déotwa gwadloupéyen ki pli fwansé ki fwansé-la limenm a komansé pa Victorin Lirèl. Ki jan nou pé konpwann on télé kon GTV pé pa mèt fouti mété 30 000 éwo pou'y difizé match a Lagwadloup? E ki moun ka finansé GTV? Lirèl!
3kanmarad ARYLundi 6 Juin 2011 à 23:54Di mwen kanmarad ola vou ou kay vwè sé ti boug Gwada-la dèmen ? Mwen an ké vwè si yo ka bay li si eurosport ayo-la ! Fè pa mwen atann si paj a Gold Cup-la menm davwa fo-w péyé !
Sa té fô toubôlman jôdi-la an vant a bèt-la dapré sa an li si facebook ayo-la... kanmarad ELI fè on pakèt konpatriyôt dè la gespora déplasé vin koté pou tann é konprann sa pwofèt-la té ni a di...kon on madanm di ! moun di sété les panthers noirs tèlman yo té an balan an konsyans pa ka ri épi lenj nwè ayo !
4kanmarad ARYMardi 7 Juin 2011 à 00:03Kolen Serin Wi Kanmarad Ary an té la kon lè a la..An tou lè ka...Mi bèl moman nou pasé èvè Elie DOMOTA ki èspliké dè A a Z sa ki ka pasé vrèman an Gwadloup..
Mi répons a on kanmarad kolen ban mwen davwa an mandé si-w té alendikatif prézan ! Misyé ka woulé ba Radyo Tropik FM<abbr class="timestamp" style="border-bottom-style: none; line-height: normal !important; font-family: 'Arial Black' !important; font-size: 8pt !important;" title="lundi 6 juin 2011, 23:46" data-date="Mon, 06 Jun 2011 14:46:04 -0700"></abbr>5HVGOHIvxwLundi 5 Septembre 2011 à 11:01
Ajouter un commentaire
Bonmaten-la si Tanbou adan jounal a Géra an tann misyé Gi Roch prézidan a lig foutbôl annou voyé labou toubôlman tèlman i dèsi dè konpowtèman annou nou sipôtè a sé ti boug-la Gwada-la...afè a suiv ! pwoblèm dèyè pôkô mannyé mésyé ! é sé nou ki ka lévé gawoulé la fwansé mété kota...