Lòtjou Bastè on sendikalis ki sòti an péyi Koré di Sid, di gwadloupéyen sanblé adan miting a LKP, jan péyi a-y suiv konba a gwadloupéyen kont pwofitasyon a sistenm kapitalis. Jou 14 désanm ka vini la, travayè fwansé ké déboulé an péyi a-yo pou pòté fòs ba pèp Gwadloup ki kay montré léta kolonyal fwansé ankò on fwa adan on kalbas sé dé kui ki ni!

On sitiyasyon ka vin pli krabik ankò! Pri a ésans wo kon sa! Pri a sé marchandiz pli wo ankò! Jenn ka kyouyé dòt jenn an péyi an-nou! E poutan pa tini lizin a zarm é dwòg an péyi-la! Sé politisyen bwabwa annou-la pa ka vwè ayen. Sèl biten ka entérésé yo sé vwè konmen konséyé yo ké pé gadé adan sanblé a-yo Lafwans kay mèt ba yo! Sé fouté fèstival mizik toupatou èvè lajan a enpo an-nou! Kontinyé kon sa, zò ké vwè si kyou a zòt pé ké fann!

LKP ki pou lèmoman sé sèl bayè ka éséyé baré van a pwofitasyon an péyi-la. On lyannaj a 48 òganizasyon ki plis  ki janmen ni fòs a onlo péyi asi latè!