Fò gwadloupéyen endépandan pannan Gwadloup poko endépandan! Pouki an ka di sa? Mouvman a libérasyon nasyonal komansé vrèman lè lèGONG vin kréyé an 1963. Apré léta fwansé pété lèGONG, dòt mouvman a libérasyon nasyonal vin parèt kon lèGLA, GRS oben LiPLG adan lélanné 70, 80. An moman-lasa moun té ka menné lalit armé pou déchouké léta fwansé. Nou sav sa sa bay, réprésyon a léta fwansé fè lalit armé fè dèyè. Adan lélanné 90, 2000, on gwan sendika vin pwan plas a lit-la, sé LiGTG. On sendika ki rivé sanblé dòt fòs patriyotik ki bay LKP an 2009. LKP ki menné an péyi-la on mouvman sosyal osèryé pannan 44 jou ki ba onlo pwoblèm léta fwansé é kapitalis pwofitan. Nou sav osi sa sa bay. An 2012, léta fwansé èvè on kalté patrona pa ka rèspèté akò a mas 2009.

Dèpi pwès 50 lanné, mouvman patriyotik-la ka monté é apré ka désann, ka monté é ka désann, mé péyi-la pa ka vansé. Dèpi pwès 50 lanné, nou ka kontinyé touné anwon. E sé pou sa an ka di fò nou bokanté fizi an-nou zépòl. I ja lè patriyòt an péyi-la komansé maché kon si péyi-la endépandan. Kivédi an tout larèl (politik, ékonomi, èspò, kiltirèl, syans ...), annou fè péyi Gwadloup maché kon si diré i té ké endépandan. Dayè sé sa moun komansé fè an spò, a pa vré? Annou endépendan pannan péyi Gwadloup poko endépendan! An péyi-la avan, moun té ka fè savon, lenj, kui, lèt èvè SEGT. Wi kanmarad, an ka chonjé lè an té toupiti, an té ka bwè lèt SEGT, an té ka manjé yaout SEGT. Lè SEGT pwan difé, an ka kwè a pa té on aksidan. Yo fouté difé adan-y pa èspré! Pouki? Sé té pou fè lèt étranjé vin anvayi péyi-la! Wi kanmarad, an 2012, nou ni on pakèt biten nou pé fè an péyi-la, nou pa bizwen fè vini! Sé sa  kanmarad, annou endépandan pannan péyi-la poko endépandan. Kon sa pèp-la ké vwè sé konstwi nou ka konstwi, pèp-la ké abityé-y maché adan on péyi endépandan menm si asi papyé i poko endépandan. E si on jou péyi-lasa ka vin vrèman endépandan, sa ké fèt natirèlman. Adan larèl politik-la, Senbawtélémi pannan i té toujou on komin a Lagwadloup, té ja ka maché kon on péyi otonòm. Lè moun Senbawtélémi mété péyi a-yo otonòm asi papyé, sé té on fòmalité!

Wi kanmarad, a pa lè on péyi ka vin endépandan asi papyé fò moun mandé-yo ka yo ka fè apré! Fò nou komansé dèpi alè vin endépandan pannan péyi-la poko endépandan asi papyé!