Apré tit a-y an kous an lign an péyti Gwadloup an 2010, misyé Boris Carèné woumèt anwout an péyi Antig an bout a simenn-la èvè dé tit a chanpyon Karayib-la. Sanmdi i gannyé kontrèlamont-la douvan Cédric Eustache a Matnik é Hilard Cinjtje a Kiraso. Lèlandèmen dimanch, Boris Carène ka woumèt anwout èvè on viktwa adan kous an lign-la douvan Efren Ortega Olivera a Pòtoriko é Stéphane Larochelle a péyi Gwadloup. Dé gwadloupéyen asi podyòm-la.

Plis ki janmen siklis Gwadloup mèt é sényè andidan Karayib-la.

Apré sé madanm-la, sé tou a sé nonm-la pou yo démaré pou prèmyé fwa adan listwa a-yo éliminatwa pou on chanpyona di mond!!! Nou poko pwan lendépandans an-nou an larèl politik-la mé èspò-la ka montré nou chimen-la.

Alò ékip nasyonal Gwadloup kay démaré faz kalifikatif a-y an péyi Sendomeng ola i kay bouwé èvè péyi òganizatè-la Sendomeng, Ayiti é Zil Vyèj Mériken.

Chanpyona di mond a volébòl nonm 2014

 Eliminatwa

Zòn NORCECA

1é tou

Gwoup C (3 é 4 novanm 2012 an péyi Sendomeng)

SENDOMENG

GWADLOUP

AYITI

ZIL VYÈJ MERIKEN

* Létwa prèmyé ka kalifyé-yo pou dézyèm tou-la

* Faz final a chanpyona di mond-la ké jwé an 2014 an Polòn

* Sé madanm-la dèpi sèktanm pasé, ja pasé prèmyé tou a faz kalifikatif-la zòn NORCECA.

Perle miny èvè prézidan a fédérasyon panamérikenn a taèkwondo é osi

èvè drapo nasyonal Gwadloup!

Perle Miny sové rézilta a délégasyon a ékip Gwadloup adan konpétisyon "open" a taèkwondo an péyi Bolivi simenn pasé. Aprédavwa i té échwé adan chanpyona panamériken-la (I pèd an prèmyé tou-la douvan on brézilyèn), i gannyé dé méday an lò aka sé jinyò-la é sé sényò-la. I gannyé aka sé jinyò-la final-la douvan on péwouvyèn 13-1. E aka sé sényò-la (ola yo té sirklasé-y), i gannyé an final douvan on awjantin 5-4. Zò pé vwè-y asi bik entèwnèt a lig gwadloupéyenn a taèkwondo ola i asi prèmyé mach a podyòm-la èvè drapo a nasyon Gwadloup.

Dé zòt konbatan gwadloupéyen té a lendikatif prézan an Bolivi. Patrice Catélo adan katégori sényò (-70 kilo) pèd an prèmyé tou-la adan chanpyona panamériken-la douvan on chilyen (2-6). Sylvain Fostin li kant a-y adan katégori sényò (-80 kilo) gannyé prèmyé tou a chanpyona panamériken-la douvan on konbatan Salvadò 4-2 mé i pèd an dézyèm tou-la douvan on mèksiken chanpyon di mond linivèsité 1-6.

Adan konpétisyon "open"-la, Patrice Catélo gannyé prèmyé tou-la douvan on bolivyen 4-2 mé i pèd an dézyèm tou-la douvan on lòt bolivyen.

Sylvain Fostin pa konbat adan konpétisyon "open"-la.

Chanpyona panamériken 2012 an vil Sucre (Bolivi)

Péyi ki adan :

Awjantin, Awouba, Bolivi, Brézil, Kanada, Chili, Kolonbi, Kòstarika, Kiraso, Ekwatè, Salvadò, Etazini, Gwadloup, Gwatémala, Ondiras, Zil Vyèj Mériken, Jamayik, Mèksik, Nikaragwa, Panama, Paragwèy, Pérou, Pòtoriko, Sendomeng, Irigwèy.

Gwadloup kay voyé twa konbatan.

West Indies chanpyon di mond!!!

Sa fèt! Pou prèmyé fwa adan listwa a-y ékip a "West Indies" vin chanpyon di mond a krikèt an péyi Sri Lanka. Tout vwazen an-nou an Karayib-la kontan toubòlman. Ki yo an péyi Domnik, Jamayik, Antig, Sentlisi, Trinidad, Senvensan, Bawbad, yo tout ka fété viktwa a ékip a-yo!

An final-la, West Indies gannyé Sri Lanka 137 pwen a 101.

Mi match-la, kanmarad!

 Kanmarad, si zò konnèt jan yo ka jwé sa, zò ké konpwann. Osinon, an ké touvé on moman pou mwen ba zòt ti-bwen lèsplikasyon.