-
Par SHAKA (Gwakafwika) le 26 Décembre 2012 à 19:08
On bon nouvèl non sèlman pou volébòl Gwadloup mé osi pou èspò a péyi-la. Péyi Gwadloup kay wousivwè dézyèm tou a éliminatwa zòn NORCECA pou chanpyona di mond volébòl a sé nonm-la ki kay fèt an 2014 an Polòn. Wi, Gwadloup kay wousivwè an mwa jen-la gwoup N-la ola tini Gwadloup, Ondiras, Domnik é Grènad. Pou on kalifikasyon pou twazyèm tou-la, fò Gwadloup bout prèmyé adan gwoup-la oben fò'y adan lékat méyè dézyèm lè yo pwan rézilta a tout sé gwoup-la ki ké jwé dzyèm tou-la. On kalifikasyon ki nòmalman adan pòté an-nou.
Sé madanm-la, kant a-yo, yo ké ay an péyi Gwatémala ola yo kay bouwé an avril pwochen, èvè Gwatémala, Senkis é Awouba adan gwoup L a dézyèm tou zòn NORCECA-la. Chanpyona di mond a sé madanm-la ké jwé an 2014 an Itali.
Chanpyona di mond a volébòl nonm 2014
Eliminatwa zòn NORCECA
Dézyèm tou-la
Gwoup N
(An péyi Gwadloup - 13, 15 é 17 jen)Gwadloup
Ondiras
Domnik
Grènad
votre commentaire -
Par SHAKA (Gwakafwika) le 19 Décembre 2012 à 13:59
Sylvain Fostin (Gwadloup)
115èm konbatan mondyal
a taèkwondo (-80 kilo).
Adan klasman bik entèwnèt a fédérasyon mondyal a taèkwondo ka sòti chak mwa, pou prèmyé fwa moun pé touvé non a on gwadloupéyen adan-y. Wi, adan katégori a mwen 80 kilo, Sylvain Fostin méyè konbatan a péyi Gwadloup é ki osi CTR a Lig Gwadloup a Taèkwondo, ka okipé 115ème plas-la asi plis ki 300 konbatan adan klasman mondyal-la. Toujou chonjé, sé rantré nou komansé rantré adan klasman mondyal-la padavwa Gwadloup afiliyé a fédérasyon mondyal-la dèpi lanné pasé. Pou lèmoman, Sylvain Fostin sé sèl konbatan gwadloupéyen ki adan klasman mondyal-la.
Dayè an bout a simenn pasé, té tini chanpyona Gwadloup kadé, jinyò é sényò an komin Tibou. On chanpyona ola yo kay pwan léméyè konbatan pou yo rantré adan ékip nasyonal Gwadloup. On ékip Gwadloup ki ké ay adan chanpyona di mond sényò an 2013 an péyi Mèksik é osi adan chanpyona di mond jinyò an 2014 an péyi Taywàn.
votre commentaire -
Par SHAKA (Gwakafwika) le 10 Décembre 2012 à 20:15
Joseph Séné an mitan a foto-la kay ni konm misyon,
woulévé foutbòl Gwadloup.
Yè dimanch, an vil Bémaho, Lig Foutbòl Gwadloup éli nouvo komité dirèktè a-y é osi nouvo prézidan a-y. San sirpriz, sé bwa dwa a ansyen prézidan-la misyé Guy Roch yo éli an tèt a lig-la. Non a-y Joseph Séné.
Misyon a-y sé ké woulévé ékip nasyonal Gwadloup é fè péyi an-nou rantré laFIFA.
Plis kamo asi foutbòl-la an réjyon an-nou, lyanné-zòt asi "Boul an Karayib-la" (http://caribbeanfoot.over-blog.com)
votre commentaire -
Par SHAKA (Gwakafwika) le 3 Décembre 2012 à 23:11
Ekip nasyonal Gwadloup nonm é fanm toujou ankous pou on kalifikasyon istorik pou on chanpyona di mond. On ripaj ki kay fèt an 2014 (An Polòn pou sé nonm-la é an Itali pou sé fanm-la).
Apré èsplwa a ékip nasyonal Matnik nonm ki éliminé Jamayik adan prèmyé tou éliminatwa a chanpyona di mond a volébòl - zòn NORCECA, nou konnèt dèpi yè, tout sé ékip-la ki kay jwé dézyèm tou-la. Ekip a nonm é fanm a ékip nasyonal Gwadloup sav aprézan kont ki moun yo kay bouwé lanné pwochenn.
Chanpyona di mond volébòl 2014
Eliminatwa - zòn NORCECA
2èm tou
Sé nonm-la
Gwoup N
Domnik
Ondiras
Grènad
Gwadloup
* Prèmyé + sé kat méyè dézyèm ékip a chak gwoup-la, ka kalifyé-yo pou twazyèm tou-la.
Sé fanm-la
Gwoup L
Senkis é Névis
Gwadloup
Gwatémala
Awouba
* Lédé prèmyé a chak gwoup ka kalifyé-yo pou twazyèm tou-la.
Chouk : www.norceca.net
votre commentaire -
Par SHAKA (Gwakafwika) le 14 Novembre 2012 à 13:24
Sa fèt! Kon an té ka di zòt adan dènyé biyé an-mwen, nasyon Gwadloup rantré adan òganizasyon a komité nasyonal olenpik a péyi Lamérik Santral é Karayib-la, yo ka kriyé CACSO. Tou sa fèt gras a pal a péyi Ayiti. Wi misyé Jean Baker, prézidan a komité nasyon olenpik Ayiti é vis-prézidan a CACSO, pòté mannèv pou fè Gwadloup é an menm balan-la Matnik rantré adan òganizasyon-lasa. E sé sa ki fèt apré akò a Komité Entènasyonal Olenpik (CIO).
Misyé Alain Sorèze prézidan a CROSGUA désidé sanblé onlo prézidan a lig é komité Gwadloup pou fè yo (sa ki poko fè-y) mété èspò a-yo adan fédérasyon panamérikenn. Pou lèmoman sé enki foutbòl-la, volébòl-la, taèkwondo-la, èskrim-la, bòks-la, bisiklèt-la, surf-la é gòlf-la ki ja afilyé adan konfédérasyon panamérikenn a-yo. Misyé Sorèze ka konté asi natasyon-la é atlétizm-la.
Tout sé èspò-lasa dwèt filé zouti a-yo, paré atlèt a-yo, pou yo pé rèprézanté nasyon Gwadloup kon i dwèt yé adan Jé Lamérik Santral é Karayib-la ki kay fèt an 2014 an vil Veracruz an péyi Mèksik.
CROSGUA alèkilé, ka pòté mannèv pou fè Gwadloup rantré osi adan komité nasyonal olenpik panamérikenn-la (PASO).
Komité nasyonal olenpik adan CACSO :
Awouba, Antig é Bawbouda, Bahamas, Bawbad, Bèmid, Béliz, Zil Vyèj Anglé, Zil Kayiman, Kolonbi, Kòstarika, Kiba, Kiraso, Domnik, Sendomeng, Salvadò, Grènad, Gwadloup, Gwatémala, Giyàn, Ayiti, Ondiras, Zil Vyèj Mériken, Jamayik, Sentlisi, Mèksik, Matnik, Nikaragwa, Panama, Pòtoriko, Senkis é Névis, Sirinam, Trinidad é Tobago, Senvensan é Grènadin, Vénézwèla.
votre commentaire
Suivre le flux RSS des articles de cette rubrique
Suivre le flux RSS des commentaires de cette rubrique