Ni Sylvain Fostin, ni Patrice Catelo pasé

prèmyé tou adan katégori a-yo adan

prèmyé chanpyona di mond a péyi

Gwadloup.

Kon Patrice Catelo, Sylvain Fostin (-80 kilo) pa pasé prèmyé tou-la. I té ka menné 4-2 é té ka rété 10 sègonn avan konba-la té bout. E poutan sé jij-la touvé mwayen ba slovèn-la Grégor Pirs 3 pwen alò kè i pa té mannyé Sylvain an tèt. Rézilta Sylvain Fostin touvé-y éliminé 4-5. On gwo enjistis mé fò nou sav Gwadloup poko fè-y on non adan sé chanpyona di mond-lasa, sé komansé i ka komansé.

Finalman sé on alman ki sòti an péyi Tirki Tahir Güleç ki vin chanpyon di mond douvan on mèksiken René Lizarraga. On konbatan a Lèspagn Nicolas Garcia é yonn a Larisi Anton Kotkov trapé méday an bwonz-la.

Sylvain Fostin dézyèm chans a Lagwadloup

adan chanpyona di mond-la.

Apré Patrice Catelo, Sylvain Fostin, 115èm mondyal adan katégori a -8O kilo, ké rantré dimanch adan chanpyona di mond a taekwondo-la. Pou prèmyé tou-la, i kay fasadé èvè on slovèn Grégor Pirs. Annou èspéré dézyèm rèprézantan a péyi annou ké fè on bèl chimen é poukwapa èvè on méday. Nou ka kwazé dwèt!

Chimen potansyèl a Sylvain Fostin

1é tou  kont Grégor Pirs (Slovéni)

* 2èm tou kont **Hayder Shkara (tèt dè séri n°12- Òstrali)

* 3èm tou kont **Arman Yeremyan (tèt dè séri n°5- Arméni)

* Kadèfinal kont **Abdoulaye Gbane (tèt dè séri n°13- Kòtdivwa)

* Dèmifinal kont ** Ramin Azizou (tèt dè séri n°1 - Azèrbaygyan- Gwan favori pou tit mondyal-la)

* Final-la kont **Aaron Cook (tèt dè séri n°2 - Zil Man)

* Si Sylvain Fostin ka kalifyé-y

** Si'y kalifyé

Patrice Catelo (-68 kilo)  asi dwat a-zòt pa rivé pli

lwen ki prèmyé tou-la. Konpè a-y asi

foto-la, Sylvain Fostin (-80 kilo) ké éséyé fè myé

dimanch.

Katégori - 68 kilo nonm : On konba é chimen-la bout ba konbatan Patrice Catelo. Prèmyé rèprézantan annou adan on faz final a on chanpyona di mond tonbé 2-7 douvan on chipriyòt Marcos Fyllakoudias. Chipriyòt-la limenm tonbé 3-8 douvan 3ème a dényè jé olenpik-la, mériken-la Terrence Jennings an dézyèm tou-la. E sé finalman on iranyen Behnam Asbaghi ki gannyé méday dò-la douvan on sidkoréyen Kim Hun. On pannyòl José Antonio Rosillo é on sénégalè Balla Dièye ka konplété podyòm-la èvè on méday an bwonz ba yo chak.

GWADLOUP, NASYON GWADLOUP, ÈVÈ DRAPO A PEYI ANNOU ADAN SEREMONI POU WOUVÈ CHANPYONA DI MOND-LA AN VIL PUEBLA AN PEYI MÈKSIK.

Sylvain Fostin é Patrice Catelo

Dé gwadloupéyen kay rèprézanté nasyon Gwadloup adan chanpyona di mond sényò a taèkwondo ki kay fèt an vil Puebla an péyi Mèksik di 15 jis 21 juiyé.  Non a-yo Sylvain Forstin klasé 115èm mondyal adan katégori a - 80 kilo é Patrice Catelo ki an katégori - 68 kilo. On moman istorik ba péyi Gwadloup padavwa sé prèmyé fwa Gwadloup kay fasadé èvè tout nasyon mondyal.

Nou ka chonjé an menm balan-la Dominique Gladone ki lagé nou an 2011.