Kanmarad, zò ja konnèt mwen, Shaka pa jen ka dòmi! E sé kon sa an voyé on démo-maké asi bik entèwnèt a CROSGUA. An di yo si nou kay adan diféran konpétisyon andidan kontinan amériken-la, zafè a drapo-la ké oblijé pozé. E wi kanmarad, nou pé pa fè lyannaj èvè vwazen an-nou é an menm balan-la pwenté èvè drapo a fwansé-la. Sé moun-la ké mal palé nou!

Kifè apré rédaksyon a sit-la réponn mwen. I di mwen CCEE (Conseil de la Culture, de l'Education et de l'Environnement) kay pòté zafè a drapo gwadloupéyen-la douvan konsèy réjyonal. I jis pwan èkzanp a Lagiyàn ki té adòpté drapo a-y. An réponn rédaksyon-la kon sa. An di pisimyé CCEE voyé dosyé-la ba konsèy jénéral padavwa nou ka touvé adan sanblé-lasa plis boug pwogrésis. E an di-y osi an péyi Giyàn, sé konsèy jénéral-la ki adòpté drapo giyanè-la.