-
Par SHAKA (Gwakafwika) le 26 Avril 2011 à 14:09
Ka gwadloupéyen vin èché adan lagè
a fwansé?
On pakèt jenn a dènyé koloni a fwansé ka pèd vi a-yo an péyi Afganistan é pon moun pa ka di ayen kont sa! Andéwò dè pòt-pawòl a LKP Eli Domota, tout gèl a politisyen bwabwa Gwadloup fèmé! Dayè ni on lanné, kat politisyen bwabwa té dakò pou jenn gwadloupéyen ay adan lagè-lasa. Afgan pa menm sav ni on péyi Gwadloup ki la asi latè é gwadloupéyen ka rantré adan on lagè ki pa ta yo! Afganistan ataké péyi Gwadloup? Fwansé é bannélo a-yo anvahi péyi-lasa pou gaz a-y é pavo a-y, yo pa vin pou sové pon pèp! Gwadloupyén tèlman yo similé, yo ka rantré adan maji a fwansé!
votre commentaire -
Par SHAKA (Gwakafwika) le 19 Février 2011 à 00:18
2Pac (1971 - 1996)
Lòtjou pa haza an tonbé asi on chenn fwansé "13ème Rue" pou pa nonmé-y. Chenn-lasa té ka pasé on rèpòtaj asi awtis mériken-la Tupac Shakur yo kyouyé on jou 13 sèktanm 1996. Vèsyon ofisyèl-la ka di sé ansyen boug ay-la Notorius Big alias Biggie ki té ké bay lòd kyouyé-y. Mé sa sé vèsyon ofisyèl-la padavwa sèlon on boug a FBI sé té ké on krim politik!!! Pou ki biten? Padavwa Tupac té ni lentansyon fè on larmé sèryé adan sé géto-la pou sé nèg-la té ké défann-yo kont sistenm a sé blan-la. Kivédi dwòg té ké disparèt é zarm pa té ké sèvi pou on nèg kyouyé on dòt nèg! Tupac té kay fè menm travay-la ki sé Pantè Nwè-la adan lélanné 1960. Nou sav sé Pantè Nwè-la sé makonmè-la John Edgar Hoover ki watibwazé yo! Chonjé an tan-lasa mésaj a Tupac té ka pasé byen adan kominoté nèg-la. Wi kon Bob Marley é Peter Tosh Jamayik, kon sé Pantè Nwè-la, Tupac té ka déranjé sistenm a-yo! Avan yo té fin pa kyouyé-y, FBI té ja monté on konplosité èvè on fanm yo té voyé pou i té pé akizé Tupac dè vyòl. On zafè ki té voyé-y adan lajòl a-yo pannan on lanné é dèmi. An bout a émisyon-la, avoka a Tupac di sé blan-la vlé nèg-la toujou rété anba, anba!
Antouka émisyon-la toujou konfirmé sa an té toujou sav. Lè on nèg ka chanté révolisyon sé blan-la ka fè-y fèmé bouch a-y!
Mi on vidéo pou montré zòt boug-lasa sé té on gwan awtis.
Me against the world
I got nothing to loose
Me against the world
2 commentaires -
Par SHAKA (Gwakafwika) le 21 Janvier 2011 à 20:01
Chak sanmdi a 6:30 PM asi "Guadeloupe 1ère" fwè Jimmy Ka prézanté on émisyon ww, non a-y "B.Game". On jé édikatif "Bworldconnection" mété si pyé ba toutmoun an péyi Gwada é Madinina. Konsyans a on pèp ka démaré èvè lédikasyon! Wi an toujou maké sa, fò nou édiké pèp an-nou é sitou ti-moun an-nou! "B.Game", zò pé vwè-y osi asi bik entèwnèt a "Bworldconnection". ( http://bworlconnection.com. )
4 commentaires -
Par SHAKA (Gwakafwika) le 15 Janvier 2011 à 19:20
Boutèy gaz-la, zò ké péyé-y
plis ki 23 éwo!
Apré Ben Ali an Tinizi, tansyon pou ti-Lirèl-la pa foukan alakous. Ti-misyé-lasa ka fè sinéma a-y pou di i pa dakò èvè òkmantasyon a pri a ésans. Vou ti-misyé Lirèl, ou an konplosité èvè gouvènè a léta kolonyal fwansé, ou toujou kraché asi mouvman LKP é ou ka fè sinéma a-w? Arété!
Pou sa ki pa toko konpwann, mi sé pwofitan-la woumèt anwout! Boutèy gaz-la, nou ké péyé-y 23 éwo kon avan, kant a ésans-la, pa menm palé!
Gwadloupéyen woukomansé pléré penn a-yo! Zò ka pléré penn a-zòt mé zò rékòlté sa zò simé!
Déotwa gwadloupéyen ki poko konpwann woufouté Lirèl la lanné pasé, mi foto a-y!
Déotwa gwadloupéyen té ka di LKP ka fè moun chyé, mi foto a-y!
Zò vlé pa jwenn on mouvman kont pwofitasyon, zò ka woumété politisyen bwabwa an péyi-la, alò sé pwofitan-la oblijé woumèt anwout!
3 commentaires -
Par SHAKA (Gwakafwika) le 5 Janvier 2011 à 18:41
Dlo monté on pakèt an péyi-la!
Jou a malè pa ni kenbwa davwa yè an té di zòt jan lapli tonbé anpil an péyi-la ; é ben mi gwo dlo-lasa kyouyé moun! 5 moun pèd vi a-yo adan réjyon Mònalo-la! 3 adan on katkat ki té ka éséyé janbé dlo an chimen magré yo té di chofè-la pa pasé la! Yonn yo touvé bomaten-la, on madanm ki té ni 41 lanné é dènyé-la yo touvé-y avan midi, sété on boug ki té kay sové moun!
Jou a malè pa ni kenbwa padavwa chonjé jan dlo té kyouyé moun an Ayiti an 2008 é chonjé lè déotwa moun Gwadloup té ka di ayisyen ni malédisyon. Aprézan sé gwadloupéyen-lasa dwèt ka konstaté dlo lapli ka kyoué moun an péyi a-yo osi!
4 commentaires
Suivre le flux RSS des articles de cette rubrique
Suivre le flux RSS des commentaires de cette rubrique