On bèl kamo pou mwen pé ba zòt. kanmarad. Fò zò sav ni on èspò yo ka jwé an sal, yo ka kriyé foutbòl an sal oben foutsal. Fò sav kanmarad, ni on òganizasyon mondyal ka konkiransé laFIFA. Non a òganizasyon-lasa sé Asosyasyon Mondyal a Foutsal (AMF). On òganizasyon mondyal ki kon laFIFA tini konfédérasyon kontinantal. E sé kon sa laCONCACAF ni pandan a-y yo ka kriyé CONCACFUTSAL. E sé la nouvèl-la bon padavwa an péyi annou Gwadloup, an mwa òktòb-la ka vini la, yo kay mété si pyé on chanpyona Gwadloup mé osi on ékip nasyonal Gwadloup. Péyi annou ki aprézan afilyé adan laCONCACFUTSAL ké pé jwé, tann sa kanmarad, éliminatwa pou lakoup di mond AMF!!!  A pa kon pou  laFIFA padavwa sa pli fasil pou péyi Gwadloup jwé lakoup di mond a AMF. Fò zò sav dayè adan òganizasyon AMF-la, zò tini osi on pakèt péyi ki poko endépendan kon Katalòn, Péyi Bask, Galis, Abakazi oben ankò Sentélèn.

Apré taèkwondo-la é volébòl-la sé aprézan foutsal Gwadloup ka rantré adan klèb mondyal-la.

Tahiti on péyi ki poko endépendan, ki maré toujou èvè kolonyalis fwansé adan larèl politik-la, ka jwé èvè dòt péyi ki yo endépendan adan on gwan ripaj a foutbòl yo ka kriyé koup a sé konfédérasyon-la. Sé òganizasyon FIFA ki mété-y asi pyé dèpi 1997. Tahiti ki poko endépendan rantré adan laFIFA an 1990. E sé pou sa nou ka touvé-y la. An 2012, i gannyé final a koup Loséani douvan Kanaky. Tahiti ki poko endépendan tonbé adan on gwoup ki rèd (E dayè lòt gwoup-la rèd osi). On gwoup otila Tahiti kay fasadé èvè Nijérya chanpyon dafwik, Lèspagn chanpyon di mond e doub chanpyon déwòp é Lirigwèy ki li gannyé dènyé Kopa Amérika-la. 

Yè Tahiti wouvè bal a-y douvan Nijérya. Apré on bèl rézistans sé "Toa AIto"-la kon moun ka kriyé yo, pwan on plich 1-6. Mé sa ki té bèl pou sé tahisyen-la sé lè yo maké bi-la an match-la. Padavwa sété yonn adan misyon a sé jwè-la, éséyé maké on bi adan tounwa-la é sé sa yo rivé fè.

 Koup a sé konfédérasyon-la 2013 an péyi Brézil

Gwoup A : Brézil - Japon 3-0

                Itali - Mèksik 2-1

Gwoup B : Èspagn - Irigwèy 2-1

                Nijérya - Tahiti 6-1

Gwadloup (an blan é blé) ki gannyé Domnik 3-0 ké atann janvyé 2014 pou'y si'y

ka pasé.

Ekip nasyonal Gwadloup ké atann janvyé 2014 èvè klasman a NORCECA-la pou'y sav si'y ka bout adan lékat méyè dézyèm. Ekip annou pèd match pli enpòtan douvan Ondiras 0-3 é potan nou té gannyé menm ékip-la yè maten 3-2. Antrénè a Ondiras té di yo pa té vlé fòsé twòp avan match a oswè-la. Pou dènyé match-la, Gwadloup pa rivé wosé nivo a jé a-y.

Alò sé nonm-la ké kalifyé-yo pou twazyèm tou-la kon sé madanm-la? Fò nou atann si mwa ankò.

Chanpyona di mond 2014

Eliminatwa - Zòn NORCECA

Gwoup N ( Adan sal èspò Paul Chonchon -Lapwent) 

15/06/13 : Gwadloup - Grènad 3-0 (25-18/25-16/25-17)

                 Ondiras - Domnik 3-0  (25-17/25-21/25-22)

                Ondiras - Grènad 3-0 (25-11/25-11/25-8)

                Gwadloup - Domnik 3-0 (25-15/25-12/25-22)

16/06/13 : Domnik - Grènad 3-1 (16-25/25-17/25-22/25-19)

                Gwadloup - Ondiras 3-2 (14-25/20-25/25-22/25-18/15-12)

               Domnik - Grènad 3-0 (25-14/25-21/25-19)

               Gwadloup - Ondiras 0-3 (21-25/14/25/11/25)

                               Klasman-la

                         1. ONDIRAS

                         2. Gwadloup

                         3. Domnik

                         4. Grènad

* Ondiras ka kalifyé-y pou twazyèm é dènyé tou-la.

   Gwadloup ké atann janvyé 2014 pou'y sav si'y kalifyé.                     

Bèna Vilis, ansyen jwè a Jiventis Sentann é a ékip

nasyonal Gwadloup lagé nou jòd-la.

Moun ki  branché asi RTB oben asi kilti FM pé ké tann on vwa yo té ni labitid tann. Wi, jòd-la, on vyé nouvèl rivé foutbòl Sentann é foutbòl Gwadloup. Misyé Bèna Vilis mò pannan i té ka fè foutin abityèl a-y asi plaj Sentann. On kriz kardyak térasé-y.  I té ni enki 57 lanné.

Bèna Vilis sé té on diksyonnè a foutbòl. Li ki té ansyen avan a Jiventis Sentann é ta ékip nasyonal Gwadloup adan lélanné 1970 é 1980.

Adyé Bèna, nou pèd onlo!

     GWADLOUP

   ONDIRAS

DOMNIK

GRÈNAD

 Sanmdi é dimanch ka vini la, ékip nasyonal Gwadloup a sé misyé-la kay jwé dzyèm tou éliminatwa a zòn NORCECA pou chanpyona di mond-la Polòn 2014. Gwadloup kay fasadé èvè Domnik, Grènad é Ondiras. On ripaj ki kay fèt an sal èspò Lapwent "Paul Chonchon". Fò ékip annou gannyé prèmyé plas-la pou'y asiré jwé twazyèm é dènyé tou a zòn NORCECA-la kon sé madanm-la.

Mi dékatman-la

Mondyal misyé 2014 Zòn NORCECA

2èm tou : Gwoup N (An sal èspò Paul Chonchon-Lapwent)

 15/06/13 :
Ondiras - Grènad (9AM)

Gwadloup - Domnik (11AM)

Domnik - Grènad (6PM)

Gwadloup - Ondiras (8PM)

16/06/13 :

Ondiras - Domnik (9AM)

Gwadloup - Grènad (11AM)

Match pou 3èm plas-la (6PM)

Match pou 1é plas-la (8PM)

* Prèmyé-la ka kalifyé-y dirèktèman pou 3èm tou-la. Dézyèm-la dwèt atann rézilta a tou sé gwoup-la pou'y sav si'y ka bout adan lékat méyè dézyèm ki ké kalifyé-yo apré pou twazyèm tou-lasa.