Gwadloup tonbé sanmdi

adan koup Karayib-la.

On gwan manman sirpriz fèt onivo a koup a sé nasyon Karayib-la. Gwadloup vis-chanpyon Karayib 2010 pa rivé kalifyé-y pou faz final a gwan ripaj karibéyenn-la ki ké fèt an débi a mwa désanm an péyi Antig é Bawbouda. Sé fòt a on ékip Gwadloup ki pa jen pwan ékip Sendomeng osèryé. Pou nou gwadloupéyen, nou té ja asiré gannyé Sendomeng avan match komansé. Rézilta, konm nou pa byen préparé nou, nou mal jwé douvan on ékip ki byen jwé é nou pèd 0-2. Jwè a ékip nasyonal Gwadloup lévé gawoulé douvan Pòtoriko mé i té ja two ta lè nou bouwé èvè Matnik padavwa sé matiniké-la té motivé pou yo pa té pèd kalifikasyon-la. Sitou yo té bizwen enki on match nil pou yo té pasé alò kè nou gwadloupéyen nou té oblijé gannyé. E sé kon sa sanmdi swè nou pa rivé gannyé, nou fè 3-3 èvè Matnik é nou touvé-nou éliminé. Sé ké prèmyé fwa dèpi 2005, Gwadloup ka raté faz final a koup Karayib-la é an menm balan-la Gold Cup a laCONCACAF.

Pou plis kamo asi koup Karayib-la, lyanné-zòt asi "Boul an karayib-la"

http://caribbeanfoot.over-blog.com

Koup Afwik 2013 an épyi Afwik di Sid

(19 janvyé jis 10 févriyé)

Gwoup A : Afwik di Sid, Angola, Mawòk, Kapvè*

Gwoup B : Gana, Mali, Nijè, RD Kongo

Gwoup C : Zanbi, Nijérya, Birkina Faso, Etyopi

Gwoup D : Kòtdivwa, Tinizi, Aljéri, Togo

* Kapvè éliminé Kamroun an kalifikasyon.

"Lagwadloup sé tan-nou"

An pé ké tadé asi rézilta a sé ti-boug Gwada-la davwa fò pa mwen soufè twòp (nou pèd 2-0 douvan Sendomeng) mé tini dé biten ki fè mwen plézi yè swa adan èstad Zabim. Prèmyé-la sé prézantasyon èspésifik a on drapo gwadloupéyen ki pou lèmoman sé drapo a Lig Gwadloupéyenn dè Foutbòl (LGF). I té an téren-la èvè drapo nasyonal a Sendomeng. Nou pa vwè pon drapo blé, blan, wouj!

Dézyèm-la sé imn-la. Pon moun pa tann imn a fwansé "La Marseillaise". Dèviné ka yo jwé? "Lagwadloup sé tan-nou" èvè son a tanbou-la! Zò pa'a tann?

Apré tit a-y an kous an lign an péyti Gwadloup an 2010, misyé Boris Carèné woumèt anwout an péyi Antig an bout a simenn-la èvè dé tit a chanpyon Karayib-la. Sanmdi i gannyé kontrèlamont-la douvan Cédric Eustache a Matnik é Hilard Cinjtje a Kiraso. Lèlandèmen dimanch, Boris Carène ka woumèt anwout èvè on viktwa adan kous an lign-la douvan Efren Ortega Olivera a Pòtoriko é Stéphane Larochelle a péyi Gwadloup. Dé gwadloupéyen asi podyòm-la.

Plis ki janmen siklis Gwadloup mèt é sényè andidan Karayib-la.

Kanmarad, péyi Gwadloup pa ka obliyé tini on péyi an Karayib-la ki fété on jou 6 out 2012 50 lanné lendépandans a-y. Péyi-lasa ki sé péyi a Marcus Garvey, Bob Marley, Peter Tosh, Bunny Wailer, Jimmy Cliff, Burning Spear oben ankò Usain Bolt, sé zò ja konpwann péyi Jamayik.

Lendi ka vini "Bworldconnection" asi "Guadeloupe 1ère" èvè natirèlman fwè Jimmy kay bay on émisyon asi 50 lanné lendépandans-lasa koté huitè é dimi oswè. Mé avan sa, a linivèsité Fouyòl adan sal a fakilté dwa "Lepointe", oswè-la, nou kay ni an "avant-première", pwojèksyon a émisyon a "Bworldconnection". Shaka ké natirèlman a lendikatif prézan!