On biten kon sa pa ka fè gwadloupéyen réyaji!

Awa, péyi-la pa tan-nou padavwa magré tout kamo moun voyé anlè sa, gwadloupéyen pa ka lévé sa digad! Béké ka mandé léta fwansé an Gwadloup ba yo on déwogasyon pou yo fouté épandaj aéryen asi plantasyon pòyò an péyi-la. Apré sa ki rivé nou èvè klòdékòn-la, nòmalman on zafè kon sa té dwèt fè gwadloupéyen réyaji! Olasa! Pèp-la adan on lòlò! Ès sé manjé-la yo ka ba yo la ka rann yo kon sa? Padavwa an pa ka konpwann! E poutan moun pé ay adan lanbasad dè Fwans an péyi-la (préfèkti é soupréfèkti) Bastè é Lapwent pou yo bay avi a-yo é pou maké yo pa dakò! An pa ka konpwann! An pa ka konpwann padavwa yè an vwè on asosyasyon "Basse-Terre Environnement" ka mobilizé-y kont sa é a pa moun Gwadloup an vwè! Nòmalman nou té dwèt wont vwè sé moun déwò ka défann péyi-la an plas an-nou. Wi, sa fasil chanté "Lagwadloup sé tan-nou! Lagwadloup a pa ta yo! Yo pé ké fè sa yo vlé adan péyi an-nou!". Sa fasil chanté sa mé "Yo pé ké fè sa yo vlé adan péyi an-nou", pèp-lasa pa ka mété-y an pratik. Awa, péyi-lasa pa tan-nou osinon nou té ké défann li.

Wi kolonyalis fwansé fò menm! Kolonyalis-la fè gwadloupéyen kwè sé enki lè yo ka fouté vòt a-yo adan bwat a lin-la, yo sé moun! Pa kont lè sé pou pòté mannèv pou di béké arété fè maji a kaz an-nou, ou pa ka vwè pon moun!

Sé jòd-la pèp Gwadloup ka menné misyé Gi adan dènyé kaz a-y Bémawo. Pou nou toujou chonjé gwan nonm-lasa, kouté é gadé "Baimbridge cho" adan sal "New Morning" an vant a bèt-la. On son zò dwèt tout konnèt, a pa vré?

Baimbrige cho, Baimbridge cho

Ka sa yé? Ka sa yé? Ka sa yé? Ka sa yé?

Maman je tape à la machine

Baimbridge cho, Baimbridge cho

Lafimé, lafimé, lafimé, lafimé!

Misyé Raoul Jòj Nicolo (1923-1993),

on gwan gwadloupéyen, moun

asi latè dwèt rèspèté!

Oswè-la an vil Gozyé gwadloupéyen kay chonjé on gwan konpatriyòt a-yo. Misyé Raoul Jòj Nicolo, on gwan savan gwadloupéyen ki envanté an 1962, blòk a komitasyon pou télévizyon a plizyè kannal ki ka fè on pòs télévizyon pé wousivwè plizyè chèn.

E wi kanmarad, lè toutmoun asi latè ka chanjé chèn a télé a-yo èvè télékomand-la, sé gras a gwan nonm-lasa!

Vandredi 25 (kivédi jòd-la) : sanblé a tout tanbouyé, chantè, dansè pou on koud'tanbou aka mann Soso (Jabren-Bémawo).

Lendi 27 oswè : véyé a misyé Gi Konkèt owa lanméri Bémawo

Mawdi 28 : Lantèwman-la

Pou sa ki pa konnèt Jabren Bémawo. Moun ka sòti Lapwent, Manten, Sentwòz, zò ka pwan dirèksyon Bastè é zò ka rivé douvan pon a Jarry-la. Zò ka pwan brètèl-la kon si zò kay an lisé agrikòl-la, zò ka pasé wonpwen-la é zò ka pwan on ti-chimen tousuit a gòch. Mé si ni twòp loto garé douvan kaz a man Soso, zò pé toujou garé vwati a-zòt anlè twotwa a lisé agrikòl-la.

Moun ka sòti Ti-bou, Kapèstè, Bastè, zò ka rivé douvan pon a Jarry-la, zò ka pwan brètèl-la kon si zò kay Jarry mé zò ka viré apré a gòch pou pwan dirèksyon a lisé agrikòl-la.

Zò pé pa twonpé zòt!

Bonbon fèt èvè chatengn

zò ké pé dékouvè adan vilaj

KBM dèmen

Kanmarad, zòt ki an péyi-la, pa obliyé vilaj KBM-LKP ka fèt dèmen douvan bik-la Lapwent. I kay démaré owa névèd'maten. Vilaj KBM (Ka pou nou bwè é manjé?), on konsèp LKP kréyé pou pwodiktè agrikòl fasadé èvè pèp-la.

An dwèt ka kwè alèkilé, moun a LKP dwèt apiyé plis ki janmen asi konstriksyon a péyi-la.