An pa ka maké plis ki sa, kouté, gadé é konpwann!

Misyé Alain Richardson a pati "Rassemblement Responsabilité Réussite" vini nouvo prézidan a kolèktivité téritoryal a Senmawten. I gannyé misyé Daniel Gibbs "divers droite" adan dézyèm tou-la, i rékòlté 5 451 vwa kont 4 134 pou lalvèsè a-y. Pannan senk lanné misyé Alain Richardson kay ni pou misyon woumèt doubout péyi-la.

An nou rantré adan mizik a zansèt an-nou pou nou rèsousé nou kon yo ka di. An nou rantré adan mizik a kréyasyon-la, méfwè!

 Kouté jan kora-la é balafon-la ka mayé, sa bèl menm!

E wi kanmarad, pa ni enki Matnik, Giyàn oben Fwans pou gwadloupéyen ay kouri bisiklèt. Nou ni osi lantou Irigwèy. Ka fè lontan on ékip Gwadloup pa té ko ay an Amérik di Sid. Pou sa ka suiv bisiklèt, chonjé adan lélanné 80, sélèksyon Gwadloup té kay kouri adan lantou Vénézwèla, oben lantou Tachira ki sé on réjyon a Vénézwèla menm. Dayè an ka chonjé misyé Jean-Pierre Matou té gannyé on étap an lantou Vénézwèla an 1988 an ka kwè.

La sé pé ké on sélèksyon Gwadloup mé i ké osi fò, sé ké USC Goyave a mòso fè-la, misyé Boris Carène ki maké non a-y adan palmarès a lantou Gwadloup lanné pasé. Wi sé ké kan menm on manman ékip davwa èvè Boris Carène*, nou ké touvé kourè kon Ludovic Turpin* (Fwans), Edwin Sanchez Anzola* (Kolonbi). Yo kay kouri adan lantou Irigwèy, on lantou ki kay komansé lè 30 maws pou'y bout lè 8 avril. On lantou Irigwèy ki kay dè wo nivo pas ou kay jwenn osi twa ékip brézilyen, on ékip mériken, yonn ki sòti Lékwatè é natirèlman on ékip kolonbyen. Onlo adan sé kourè-lasa trapé méday adan dènyé jé panamériken ki té fèt lanné pasé Guadajalara (Mèksik). Alò a pa on ékip an kouyonnad nou ké voyé la!

(* Yo asi sé foto-la)

Jòd-la, an ka jété on zyé asi kou mondyal a lò-la é an ka vwè asi sit a "sacra-moneta" yonnka bay grenn sèl a-y ; i ka di : "Les négociants en or qui se rendent au Mali (ou dans d'autres pays d'Afrique) ont pour but d'acheter l'or le moins cher possible pour le revendre le plus cher possible : ils font des affaires en profitant de l'ignorance (et de la misère) de leurs interlocuteurs . Les producteurs d'or d'Afrique devraient se grouper en syndicat pour vendre leur or à meilleur prix".

E kan menm sa, moun ké di yo pa ka volé afwiken!