Pannan èspòtif gwadloupéyen ka pòté fòs a-yo ba fwansé adan chanpyona di mond é jé olenpik, ni èspòtif èspésyal ki yo ka pòté méday ba péyi a-yo Gwadloup. Sé moun ki malérèzman ni on andikap mantal. Fò pa nou konfonn sé jé-lasa èvè jé para-olenpik ki la pou moun ki ni enki on andikap fizik. Sa ka fè an ka kwè twazyèm édisyon Lagwadloup adan. Ki jan fè on koloni a fwansé pé adan sa? Sé padavwa Gwadloup trapé on akréditasyon pou'y alé adan konpétisyon kon sa. Sé èvè taèkwondo, sèl moman èspòtif Gwadloup ka goumé ba péyi a-yo.

Edisyon 2011 fèt pa ni lontan an Grès an vil Atèn é sé kon sa délégasyon Gwadloup rivé trapé Kat méday adan jé olenpik èspésyal-lasa. On méday an lò é yonn an bwonz an atlétizm. On méday an bwonz an baskèt é on méday an bwonz an natasyon.

Sa kan menm dézolan vwè sé enki asi Radyo Tanbou Banbou yo palè dè sa. Nonsèlman palé dè ti-moun annou ki andikapé sa ka fè yo chyé kon si diré sé enki lézòt sa ka rivé é osi palé dè gwadloupéyen ka défann péyi a-yo é pa LaFwans, yo anmèwdé!

Mi jenn an-nou!

Marysa Antoine : 1 méday an lò (200 mèt) é 1 an bwonz (100 mèt) an atlétizm.

Richardson Bedminister : 1 méday an bwonz an baskèt.

Arthur Bernadin : 1 méday an bwonz an baskèt.

Roselito Bièvre : 1 méday an bwonz an baskèt.

Christopher Birgatha : 1 méday an bwonz an baskèt.

Kévin Lamovaltay : 1 méday an bwonz an baskèt.

Fritz Lollia : 1 méday an bwonz an baskèt.

Daniel Loobie : 1 méday an bwonz an baskèt.

Nathanael Mericris : 1 méday an bwonz an natasyon (50 mèt naj lib).

Mansyon èspésyal ba :

Guillaume Jean-Denis ki rivé dé fwa an pyé a podyòm-la adan 100 mèt é 200 mèt-la an atlétizm.

* Chak atlèt séparé an divizyon sèlon léta a andikap a-yo.

Kouté, gadé, tann pou zò konpwann! Gwadloupéyen ki konpwann yo pli fwansé ki fwansé, mi foto a-y!

E apré tousa, ou ké touvé nèg ki pé ké jen konpwann

toujou!

Pou sa ki pa'a rivé kwè, mi foto a-y! Zò konpwann

sé jé?

LKP li osi i vwè-y, mi sa i ka déklaré!

Èkzibisyon a trofé kolonyal a 14 juiyé 2011

14 juiyé, on trantenn jenn gwadloupéyen ka fè èstaj a-yo SMA té ka défile asi boulva Champs Elysée. Ka fè 50 lanné SMA ka "fòmé" jenn ki pa ka rivé lékòl adan dènyé koloni a fwansé. Fwansé yomenm a-yo ka blagé lè yo ka di yo ka rivé fè 85% a gwadloupéyen ki adan SMA touvé on travay. Magré nou adan on péyi otila 6 jenn asi 10 pa ka rivé touvé travay.

Alò poukisa yo pa ka mété menm biten adan "métropòl-la" si sa ka maché si byen? Poukisa yo pa ka mété SMA toupatou adan "Fwans Èkzagòn-la" é arèsté chomaj aka sé jenn-la?

Tèlman biten-lasa té ké bon, Nicolas Sarkozy adan famé "Etats Généraux" a-y té prévwa mété dé fwa plis moun adan SMA-la, sa té ké pasé dè 3000 a 6000 jenn. E pannan sitan, AFPA Gwadloup té ka fèmé. Famé sant réjyonal a-yo (CRFP) ki té pou pwan plas a LAFPA poko rivé vwè jou.

Pli fò ankò, on ventenn ti-moun abiyé an doudou kon antan lakoloni, ki té ni oplis 12 oben 13 lanné, té an mitan sé sòlda-la. Mé ka ti-moun té ka fè adan on défilé militè èvè sòlda, fòs èspésyal, léjyonnè, parachitis, moun ka simé lanmò toupatou?

Démonstrasyon-lasa té ka fè moun chonjé ti-moun yo té ka sanblé pou yo chanté é dansé ba sé diktatè-la. Chonjé osi pa ni lontan, jan yo té ka fè fanmi an-nou chanté "Maréchal nous voilà" !

Menm si SMA la pou ba jenn gwadloupéyen fòmasyon, an nou réfléchi si prézans menm a on biten kon sa an péyi  an-nou é asi osi prézans a jenn èstajyè é ti-moun Gwadloup  adan défilé a 14 juiyé. Fwansé bizwen :

. Montré moun asi latè é piplis pèp fwansé, gwandè é fòs a lanpir kolonyal fwansé.Kon on moun ka montré on trofé i gannyé. Kivédi Lafwans té ni on misyon sivilizatris ola i té ni on pouvwa bondyé té bay pou'y lévé é édiké moun wòlbo pou yo té pé sav mofwazé an nonm.

. Bay osi lidé otila gwadloupéyen té ké pli kouyon lékòl ki jenn fwansé. E sé poukwa yo té ké mété SMA Gwadloup. On lékòl ki pa chouké adan réyalité a péyi Gwadloup oblijé fè jenn an-nou pa rivé ni bon rézilta.

. Mété adan kabèch a jenn gwadloupéyen san Lafwans yo pa ayen.

. Kontinyé adan zafè a "L'année des outre-mers" ola yo bizwen vwa a dyaspora-la pou pwochen élèksyon a prézidan fwansé.

Sa senten! Nou adan fil dwèt a lwa a 23 févriyé 2005 ola yo té ka di kolonizayon é domininasyon a pèp té on bèl biten.

Apré, ké rété yo on sèl biten pou  fè : ay fè nou voté adan élèksyon a-yo é fè nou konpwann nou kapab gidonné vi é divini an-nou. E pannan sitan, sosyété Gwadloup ka mò piti a piti.

              NOU PE KE LESE YO KYOUYE PEYI-LA E PÈP GWADLOUP!

              ANSANM, ANSANM, ANNOU KONTINYE DECHOUKE PWOFITASYON!

              GWADLOUPEYEN DOUBOUT!

              GWADLOUP SE TAN-NOU! A PA TA YO!

LKP - Lapwent - 17 juiyé 2011.

------------------------------

Shaka éséyé mofwazé tèks a LKP adan lang Gwadloup-la é an ka kwè i dwèt adan kan menm!

--------------------------

Gwadloup, i adan lèmond, i pa an Fwans

Léta néo-kolonyal fwansé bizwen fè gwadloupéyen bwè dlo mousach pou lèt! Léta fwansé vlé fè nou valé sé on boug ki fè nou! Léta fwansé vlé pa rèkonnèt sé nèg ki libéré nèg! Alò zafè a 21 juiyé a-yo, nou sanfouté! Jou-lasa nou ka travay!

Mi kon sa yo enmé jenn an-nou!

Pou on fwa moun ki ni lotorité an péyi Gwadloup fè travay a-yo. Lòtjou kivédi an bout a simenn pasé, yo arété on toufé-yenyen adan on plaj Gozyé "Les Salines". Mé a pa té on toufé-yenyen kon sa té ka fèt avan mé on fèt ola moun ka bwè on pakèt alkòl andidan-la. Konmen moun ki té adan sa? 800 moun! Zò li-y, 800 moun! Pli bèl-la, pon moun té ba yo lotorizasyon pou fè fèt-lasa. Pon moun té ba yo lotorizasyon vann alkòl. Pou vann alkòl on koté fò'w tini on lisans. San konté sé vwazen-la moun ka déranjé èvè mizik-la. San konté osi laliwondaj a plaj-la moun ka sakajé. On dòt kalté "Mercury Day", an di zòt! Mi èvè sa yo ka pwan jenn an-nou!

Pa kont pou touvé 800 jenn pou on mobilizasyon osèryé, ou pa'a touvé pon moun! Sa nòmal piskè yo alèz an sistenm-la! Sa nòmal piskè yo fouté pèp an-nou adan on nwasè! Bay amizman é ou trankil!  Èvè amizman, pèp ka obliyé pwoblèm a péyi-la, pèp pé pa lévé gawoulé kont on sistenm! Èvè amizman, sé pwofitan-la pé kontinyé bwè dlo a-yo an péyi-la.