Twòp nèg adan ékip nasyonal a fwansé?

Bik entèwnèt a "Médiapart" an Fwans sòti on dosyé ka brilé asi dirijan a foutbòl fwansé. Sé dirijan-lasa ka déklaré fò yo mété on kota asi jwè nèg é arab. Kivédi tini twòp nèg é arab, pa tini asé blan adan ékip nasyonal fwansé! Hé, hé? Fwansé bizwen fè kon Laoland? Chonjé avan jan ékip nasyonal olandè-la té tini on pakèt nèg adan-y. Pèp a péyi-lasa té di on jou i pa dakò èvè sé kalté biten-lasa. Marco Van Basten ansyen gwan jwè a Ajax Amsterdam é Milan AC(Itali) té désidé blachi ékip-la. Sa kivédi alèkilé, lè ékip nasyonal Oland ka jwé, ou ka touvé oplis twa nèg adan ékip-la. E fwansé bizwen fè menm biten! Sa oblijé padavwa dèpi 2006 fwansé touvé yo pa ka woukonnèt-yo adan ékip-la. Si yo pa ka woukonnèt-yo sé padavwa tini twòp bazané adan-y! Pa obliyé osi "Front National" ka monté anflèch an Fwans é ayen pa'a di nou fwansé pé fouté Marine Lepen an tèt a péyi a-yo!

Mwenmenm an-mwen Shaka, tout sé biten-lasa pa ka déranjé mwen padavwa an sé on boug ka milité pou libérasyon a péyi a-y ki sé péyi Gwadloup. Mwenmenm an-mwen, an pa maré èvè Lafwans. An pa ka douwé fwansé ayen! Pa kont fwansé ka douwé mwen! Fwansé ka douwé pèp Gwadloup! Fwansé ka douwé rèkonésans a péyi, nasyon é pèp Gwadloup! Yo ka douwé pèp Gwadloup libèté a-y! Alò konm mwenmenm an pa maré èvè fwansé, sa fwansé ka fè an péyi a-yo, sé pwoblèm a-yo! Si yo vlé pa vwè bazané an ékip nasyonal a-yo, sé pwoblèm a-yo! Mwenmenm, an ka di zòt, an pa té ké sipòté vwè ékip nasyonal Gwadloup èvè on pakèt blan adan-y! Poukisa? Padavwa majorité moun ka jwé foutbòl Gwadloup sé nèg!

Fwansé vlé pa vwè nèg an ékip a-yo alò tout sé nèg-la ka révé yo ké jwé ba Lafwans, yo pèd fil a-yo! E sé pou sa an ka di nèg, zò ni on péyi, ay défann li! On boug kon Didier Drogba, an oblijé enmé-y onlo padavwa i jwé ba Olymique Marseille an Fwans, i ka jwé alè ba Chelsea an Anglètè mé lè sé pou défann mayo a on ékip nasyonal, i ka pòté mayo a péyi a-y ki sé péyi Kòtdivwa.  Konm Didier Drogba ni doub nasyonalité, i té pé jwé ba Lafwans mé i té préféré chwazi péyi a-y Kòtdivwa! E Drogba pa ka règrété, i fyè jwé ba péyi a-y!

Alò sé pou sa an ka di foutbalè Gwadloup ki ka woulé adan klèb éwopéyen, jwé ba péyi a-zòt, pòté mayo a péyi a-zòt, péyi Gwadloup!

Ni on gwadloupéyen ki ja konpwann sa dèpi lontan. Non a-y Stéphane Auvray. On boug ki komansé jwé boul Senmawten, i kontinyé woulé an Fwans é alè i adan péyi Etazini. Boug-lasa sé on réyèl gwadloupéyen, sé osi on réyèl karibéyen (Madanm a-y sé on moun Trinidad)! Misyé toujou déklaré i ké kontinyé pòté ho koulè a Lagwadloup.

Didier Drogba toujou ka pòté                    Menm biten pou Stéphane

ho koulè a péyi Kòtdivwa!                         Auvray ba péyi Gwadloup

Gwadloupéyen pa ka konpwann!

Magré tout pawòl yo di zòt avan pak té komansé, zò ka kontinyé jété zòdi asi plaj Gwadloup! KOUNYA MANMAN-ZÒT!! An té byen vlé vwè blan pwan péyi-la an men a zòt bann dè malpwòp ki zòt yé! Péyi Gwadloup sé louwé nou ka louwé-y oben péyi-lasa sé tan-nou? Alò si péyi Gwadloup sé tan-nou, annou rèspèté-y souplé! Domnik ki a tè-la la, pèp a-y ka salòpté-y? AWA! Pèp Domnik sav yo ka viv adan on péyi endépandan é yo pé ké touvé manman Langlètè pou okipé dè yo! Konm gwadloupéyen ka konpwann yo ni on manman ki sé Lafwans, alò yo byen sanfouté! Adan lavi, on ti-moun pa ka rété ti-moun ankò, i ka gwandi. Ès gwadloupéyen paré pou yo gwandi? Sé pou sa an ka di lendépandans sé ké on bèl biten ban-nou padavwa lendépandans ké oblijé fè gwadloupéyen vin rèsponsab, yo pé ké ni on manman Lafwnas dèyè do a-yo ankò! Lendépandans ké oblijé gwadloupéyen rèspèté péyi a-yo!

Pannan fwansé ka fouté gawoulé an kòtdivwa, pannan fwansé ankò èvè rèstan bannélo a-yo ka kyouyé moun an Libi, kontinan Afwik-la ka'y ka fè pou arété sa? Linyon afwikenn ka'y ka sèvi? Lafwik ké kontinyé lésé lòksidan malmenné-y kon sa? Lafwik ké lésé péyi kon Lafwans, Etazini, Anglètè kontinyé volé tou sa'y ni? Lafwik dwèt fè on lyannaj osèryé é pa on lyannaj an kouyonnad! Èvè Lalibi, Lafwik té voyé on satélit adan lèspas. On biten ki té ka déranjé lòksidan. Pou lòksidan fò Lafwik toujou rété dèyè pas lòksidan bizwen tou sa'y ni! Pou lòksidan fò pa Lafwik fè on lyannaj osèryé! Lyannaj on pawòl défen Berhane Selassie (Bob Marley) té ka chanté an 1979. Tann é gadé sa!

How good and how pleasant it would be

Before god and man

To see the reunification of all

Africans

Kowosòl é ponm-kannèl ka ba moun maladi a Parkinson? Ki kouyonnad

é sa ankò? An nou kontinyé manjé sa ki tan-nou!!!

Adan jounal a-yo "Fwansmanti" pou pa nonmé-y, yo maké Kowosòl té ké ba moun maladi a Parkinson. Alò si an konpwann byen on boug kon Mohamed Ali té ka fouté an kò a-y on pakèt kowosòl, a pa vré? An té'é byen vlé sav ka dòktè Henri Joseph ka pansé dè biten-lasa! Sé moun-la pa tini pon kalté prèv syantifik é yo vlé mal palé fwi an-nou. Pou ki biten yo pa ka di menm biten anlè fwi ki sòti lòtbò? Pou ki biten yo pa ka di "pomme" a-yo, "pèche" a-yo, "poire" a-yo ka ba moun maladi a Parkinson osi? An ka kwè ni on volonté pou fè gwadloupéyen pè! Ni on volonté pou fè gwadloupéyen lagé fwi a péyi a-yo pou yo ay manjé ta lòt-la! Dòktè Henri Joseph ki sé on syantifik ka di fò nou manjé fwi a péyi an-nou padavwa sé fwi-la nou ka manjé la sé médikaman! Wi sè é fwè Gwadloup, an nou kontinyé manjé sa ki tan-nou!

Jenn an-nou fè péyi a-yo plézi pannan vakans a pak-la padavwa gwadloupéyen pwan on pakèt méday an larèl a-yo piplis an natasyon. Wi adan CARIFTA GAMES natasyon an péyi Bawbad, Gwadloup rivé trapé 55 méday (11 an lò, 25 an awjan é 19 an bwonz). Sa myé ki lanné pasé ola Gwadloup té trapé 47 méday an péyi Jamayik. Gwadloup ka bout ripaj natasyon-la prèmyé nasyon èvè 747 pwen douvan Trinidad é Tobago (679) é Bahamas (599). Najè Gwadloup ka ban nou mo pou péyi Bahamas lanné pwochenn èvè pou misyon kontinyé dominé natasyon adan Karayib-la.

Adan CARIFTA GAMES atlétizm-la an péyi Jamayik, Gwadloup fè on méyè rézilta ki lanné pasé ola i té pwan enki 3 méday. Gwadloup trapé lanné-lasa 6 méday (3 an lò, 1 an awjan é 2 an bwonz). Gwadloup ka bout senkyèm nasyon lwen dèyè Jamayik ki trapé 66 méday (33 an lò!!). Jamayik sé vrèman on nasyon a atlétizm! Nou pé répété sa!